演技大躍進 嘉欣BB獲珍姐撐瞄準視后
入行九年的鍾嘉欣多年來一直埋頭苦幹拍劇，原來已累積了三十多套劇，近年嘉欣演技大躍進得到觀眾認同，論資歷與實力，再加上最近孭飛新劇口碑，看來嘉欣有力更上一層樓，時來「后」到。
鍾嘉欣在電視劇《溏心風暴》演的「常在心」很受歡迎，該劇早前在深夜重播，當時仍屬新人的她演技幼嫩，與現時《巨輪》的「卓靜」揮灑自如，明顯士別三日。接近年尾，坊間也睇好嘉欣BB今年有力挑戰無綫台慶頒獎禮「視后」寶座，嘉欣受訪時談到封后機會，她說：「自己冇刻意去做一啲準備，將心態調節到工作，唔係為咗獎項，反而睇重作品嘅口碑，好開心《巨輪》出街之後口碑好好，聽到好多朋友話我今年有機會攞視后，自己覺得攞獎係需要天時、地利、人和配合。」
短訊打氣
嘉欣坦言望透過「公投」得視后，她覺得觀眾每一票就是最寶貴的支持。無綫高層曾勵珍少有對演員輕言稱讚，故嘉欣透露近期接到珍姐打氣短訊倍感高興：「好多謝珍姐，珍姐平時好少讚人，之前收到佢短訊讚我有進步，話戥我開心同驕傲，呢番讚賞比攞獎更大鼓勵。」
開幼稚園
劇中嘉欣望擺脫「金絲雀」的千金小姐生活，創一番事業，現實中嘉欣也有生意大計：「自己一直想做生意，唔係要賺大錢，只係想一家人一齊做，近來諗到不如將來返加拿大開幼稚園，嗰邊需求好大，爸爸媽媽可以有工作寄託，自己都會幫手，可以一家人一齊做。」
場地：Tasting Room
服裝：A｜X
化妝：Kenny Cheung@K's Creative
髮型：Roy Tse@Hair Corner
採訪：影視組
攝影：劉智源