昨日熊黛林所屬的模特兒公司Style舉行兩周年活動，分別於下午和晚上有慶祝派對。原本公司表明Lynn會連踩兩場，但昨日她完成下午的活動後，便靜靜雞趕到機場，乘坐傍晚六時五十分的CX 703班機飛到泰國會合城城。據知城城會於女友Lynn生日（10/10）前夕在泰國曼谷為新戲《Ｂ＋偵探》開鏡，相信二人計劃提早飛到當地享受寧靜的二人世界，度過甜蜜又火辣辣的生日夜！
男友行蹤瞭如指掌
Lynn昨日穿上全套Fendi服飾出席活動過後，便留下陳碧舸等一眾「姊妹」，匆匆換上輕便牛仔褲、手挽Chanel手袋便直奔機場，心情靚絕的她風騷非常，問到是否會合在日本工作的城城？她笑說：「唔係，（生日喺香港過？）應該唔喺，（日本？）唔係呀，（咁去邊呀？）唔答呀，（城城送咗生日禮物畀你未呀？）未呀，一份都未收到。（去到咪收到囉？）去到梗係收到啦，我咁多朋友。」
而昨日活動中Lynn被問到如何慶祝生日時亦大賣關子：「唔講得，過完就知，（兩個人過？）唔係自己一個人過，（咁兩個人定一大班人？）唔講，總之唔係一個人啦，（今年會唔會抱狗？）唔知。（咁會點慶祝？）唔講點樣慶祝，唔想畀人話我講啲咩，（城城介意？）我唔鍾意畀人攞嚟講。」對於有指城城拒會舊愛紀香急急回港交人，Lynn一副得知男友行蹤的口脗說：「佢都唔喺度（香港）。（今年係最後一年二字頭生日喎？）我好開心呀，我覺得依家愈嚟愈成熟有女人味，我都好欣賞張曼玉、王菲同鞏俐咁有女人味，我依家都不斷努力學習，（襯番城城？）我覺得成熟嘅女人吸引過後生嘅女仔。」
至於日前Amanda S.撐她可以找到一個更高和更好的男友？她繼續盲目地說：「之前有好多新聞係作古仔，令到好多朋友擔心我，其實真係冇嘢！（覺唔覺得城城好花心？）嗰啲唔係事實，亂寫，（你好信佢？）亂作啫！」記者笑指她何以知道是亂作？她即語塞。那城城是否已認錯？她傻笑說：「冇做錯點解要認錯！」
經理人爆放五日假
據悉城城昨日亦已由日本飛到泰國，準備為明天的新戲開工，而十一日便要趕返香港工作。至於城城經理人小美被問及城城是否會和Lynn慶祝生日？她說：「對於藝人工作以外嘅嘢係唔會過問，所以我都唔係咁清楚，不過藝人都係人，有正常社交唔需要大驚小怪。」而Lynn經理人Kim則說：「佢會放四、五日假過生日，不過去邊我就唔知，私人嘢我唔知亦唔會問。」與小美口徑一致。
而早前被拍得獲城城以靚車接載而傳緋聞的王秀琳（Mango），對於城城與熊黛林慶祝生日一事顯得避忌：「唔答喇，（Amanda S.暗指熊黛林愛情盲目？）我都唔識熊黛林，冇回應。」
文：名人組 攝：追蹤組