家陣啲年輕人話要結婚，好多時做父母嘅都完全控制唔到，如果仔女婚後搬出去住嘅，當然唔理得咁多，但如果要住埋一齊，咁就要留意嘞！婆媳間如果經常家嘈屋閉，你都咪話唔頭痛，古人有「揀媳五不」，今日就同大家講解一下。
呢個「揀媳五不」，其實係以傳統相學觀點出發，認識婆媳相處之道，到咗今時今日，仲非常有參考作用。例如古人揀媳婦首要額不可高聳，以相學嘅解釋，女性如果額頭又高又凸，代表自尊心強，情格倔強，不願聽取他人意見，在家中嘅奶奶好言相勸，佢都會無動於衷，慢慢就會出現摩擦，自此爭拗不斷，令問題一發不可收拾。
第二不，就係眉毛不可生得雜亂，女性嘅眉毛以生得貼順為好，如果生得又亂又雜，有幾根仲豎起，代表個性十分強悍，有大丈夫本色，但最衰就係好同別人爭強，乜嘢事都要認第一，注定係個唔識討好人嘅媳婦。
第三不，就係耳仔不可以冇溝，耳仔內軟骨，有一個彎彎凸出嘅內輪，加外耳仔邊嘅外輪，每個人嘅耳仔都有，但兩個輪之間嘅距離，原來生得愈近，代表愈喜歡接觸新事物，咁本來係好事，但往往攞住新觀點嚟做人，對老人家嘅教訓不加理會。
第四不，就係下巴不可尖短，原來下巴尖短代表個性自私，對人冷淡，器量狹窄，婆媳間雖唔會有太大嘅衝突，但就永遠唔會有改善關係嘅機會。而最後一點，就係不要頭頂有兩個轉，俗語有話「一轉人，二轉鬼，三轉馬騮仔」，頭頂有三個髮轉嘅小朋友特別調皮，而有兩轉就代表份人脾氣唔好，難於相處，明白呢「五不」之後，大家揀老婆識點揀啦！
撰文：小德