齊齊飲醉

呢單新聞喺網上已經引起廣泛嘅討論，有人幫個男生講說話，但大部分人都係幫個女仔，誰是誰非，先交代番個古仔，話說李君30歲，因專心工作，所以一直搵唔到女友，怕家鄉父老逼婚，於是喺網上搵到王姓女子，答允假扮女友，陪同回鄉。

而王女亦怕中途出現問題，於是先寫好協議書，列出每日日薪三百，如果每日拉手和擁抱超過十次，就要加收一百等條款，但協議書上冇寫明發生關係又點計數，可能王女覺得李某可靠，不會亂嚟，所以冇特別寫上，於是兩人簽署後就返李某老家，起初幾日都冇問題，男女各自回房休息，怎料第四日去李某舅舅屋企，兩人同時飲醉，舅舅安排兩人同房，嗰晚兩人就發生咗關係。

涉嫌賣淫

事後王女當然蝕底咗，但唔錯都錯咗，最後只要求男方畀多一千元小費，換轉普通人，一定畀多一千就了事，但呢個李某唔知挑起條乜嘢筋，反而指摘王女，話咁做等同性交易，有嫖妓賣淫嘅可能。王女當然唔會就咁放過男方，於是喺網上呼冤，有網民指摘王女攞嚟賤，只怪佢當日貪心，於是一失足成千古恨，但有更多嘅網民，就指摘李某不對，佔了便宜仲要惡人先告狀，仲話當日王女應先告佢強姦，再慢慢要求同李某談賠償，咁就唔會畀男方佔咗先機。

有網友就話協議書講明雙方關係只係暫時情人，做任何情侶嘅行為都要額外收費，雖然性交沒有列出，但如果出現咗，就應按合約精神而作出賠償，不應因為冇寫就可以唔負責。講到法律就要打官司，到時雙方都要破財，捐失就唔止呢個數添。

撰文：小德