罰款三萬

話說遼寧省某個巿嘅公安人員，喺舊年12月，就用「放蛇」嘅方法，喺酒店房間拉到一名妓女，而酒店負責人同埋提供「妓女」嘅足浴公司，夾埋罰咗三萬大元，有關人士仲要行政扣留十五日，該次事件引起關注嘅係有關單位嘅行動手法。

內地冇「放蛇」嘅術語，而係用「釣魚」，即係以警員為餌，引犯罪分子上釣，而當晚飾演嫖客嘅，就係有關單位派出嘅警員。事後酒店同足浴店負責人翻查閉路電視，發現警方派人租房入住，之後三次致電酒店樓下的足浴中心要求搵「小姐」，由於足浴店係正規經營，所以冇上房服務，於是婉拒，當第三次打落嚟，接聽員工以為客人十分需要，於是聯絡相熟小姐幫忙。

公報私仇

當妓女上房後，埋伏嘅探員一舉出現，拘捕妓女後只罰扣留三天，但足浴店嘅經理同「代找外人」嘅服務員，就要罰款同扣留，當地新聞都有詳細報道。事件傳開後，網友極之不滿警方採用「釣魚」行動嚟掃黃，因為有「引人犯罪」之嫌，而且爭論最多嘅就係處罰不公，好似個妓女身無分文，所以就從輕處理，但公司員工就要罰巨款同埋踎足十五日行政扣留，似乎有欠公道。

而且更有網友傳言，今次行動好似擺明針對酒店同埋足浴店，會唔會有人公報私仇或者乘機打壓敲詐，咁就不得而知，亦有網友指出呢兩間場正正因為冇人「關照」，諗住正經做生意，點知一樣會惹嚟無妄之災，所以北上做生意認真要小心呀！

撰文：小德