遺產做魚餌

騙徒首先喺報紙徵婚交友欄登廣告，內容大約係：「……美麗動人，因家貧無奈嫁傻商人，夫車禍逝世，尋一知己男子，結伴一覽大好河山。」單係前一段就已經十分吸引，美麗少婦，因丈夫車禍逝世，希望尋找異性知己，結伴暢遊神州大地，但最攞命嘅地方仲係喺後面。「……如情投意合，丈夫千萬遺產，全數經公證交你名下處理。」即係話暢遊期間你表現好，會嫁畀你讓你接管千萬遺產。

係男人見到咁嘅廣告都會心動，就會打電話去查詢，於是就開始跌入騙子嘅圈套，接電話嘅自稱係間交友公司，要應徵者先講一啲個人資料，之後就會叫你等消息，話少婦如果有意思，會主動打電話跟應徵者聯絡，不出三日，少婦電話就到。

先畀公證費

一般都由閒談開始，講講吓就會講少婦嘅坎坷身世，最主要就講丈夫生意有幾多幾大，自己根本唔識打理，所以急住搵一個好男人，付託終身，仲話好希望盡快見面。原來交友公司規定，見面就要先畀三千元，好多人為一睹少婦嘅風采，都會主動交上三千元。另外交友公司會游說應徵者盡早報名參與富婆嘅旅行團，團費八千，一般都會先交一半做訂金，呢兩筆錢大多數人都會匯過去。

見面日富婆當然失蹤，但好快會用電話聯絡應徵者話佢已經合格，但公司臨時出事，不能赴約同旅遊，好想快啲將公司交畀應徵者打理，建議找公證公司做公證，費用由萬四到十萬不等，做好馬上就可以雙宿雙棲、當錢一轉入所謂公證公司戶口，神秘富婆就會去如黃鶴，找交友公司當然唔會負責，於是被騙嘅應徵者只好啞子食黃連。

撰文：小德