現代人嘅性生活太過放蕩，令身體大受影響，所以有人提倡復行禁慾主義，修心養性。但據性心理學家指出，無論男女，如果長期性慾受到壓抑，對身體同樣有嚴重嘅影響，呢個道理喺中國古代房中術中，早就已經提及。
影響身與心
據近代性心理學家指出，長期處於性壓抑嘅狀態，對身心都有影響，很容易患上「愛情綜合症」，呢種症嘅患者會出現精神萎靡，失去鬥志，四肢乏力，食欲不振，少眠多夢嘅情況，嚴重嘅仲會出現心跳、心慌、胸悶、氣喘等嘅徵狀。
研究仲舉咗個例子，就係調查過一批喪失配偶嘅男士，佢哋患病嘅機會會大增，而且特別容易衰老，甚至死亡，如果感情愈深者，影響會愈大，除咗身體受損害之外，心理亦會有毛病，例如易患焦慮、抑鬱、狂躁、自閉等問題，嚴重嘅仲會自殺。
古人的智慧
而喺中國古代嘅房中術著作中，早就已經談論過呢個話題，叫大家千祈咪禁慾，好似《素女經》中講過：「陰陽不交，則生痛淤之疾，故幽閑怨曠，多病而不壽。」《千金要方》亦講過：「男不可無女，女火可無男，無女則意動，意動則神勞，神勞則損壽。」兩篇嘅觀點都係反對禁慾，如果逆天而行，強行禁慾，只會影響身體健康。
古人認為，上天創造男女，就係要佢哋陰陽交合，生育下一代，讓人類得以繁衍，如果陰陽不交，除咗身體會出問題外，心理亦會出現問題，影響生活，所以不可輕言禁慾，但當然亦不可以此作為放縱情慾嘅藉口。
撰文：小德