撰文：賢

一字排開

人性本貪，女人就貪靚，男人亦會貪靚，但係相對於追求高強性能力，靚樣始終都要排得較為次要。為咗增強性能力，男人真係無所不用其極，有人會飲蛇血、食毛茸茸嘅鴨仔蛋、用生雞蛋溝雞精等等，傳聞之中，飲人奶亦係其中一個壯陽方法，雖然未證實是否真正有效，唔少男人都相信呢回事，日本男人亦將人奶視為滋養壯陽妙品。最近，東京歌舞伎町就出現咗一間專賣人奶嘅專門店喇！呢間專門店裝修到好似酒吧一樣，有張長長嘅吧枱，舖內亦有枱枱櫈櫈畀客人坐低傾吓偈。不過，有別於一般酒吧嘅地方，係吧枱後面企咗三位女仔，年齡介乎20至30歲，佢哋並唔係侍應或者廚師，而係提供人奶嘅奶媽！三位女仔都會赤裸上身一字排開，等入到嚟嘅客人慢慢欣賞，決定飲用邊一個女仔嘅「出品」。

每杯二千

負責人加藤表示，專門店開業以來人氣急升，成為好多男人強壯身體嘅好去處。加藤仲表示，大部分嚟幫襯嘅客人，年齡通常係三十歲至四十歲，另外，六十幾歲嘅客人亦唔少，可想而知，日本男士的確深信人奶有滋補強身嘅作用，亦認為呢種滋補方法完全出自天然，比起當地好多所謂合成強壯飲品及補藥更加安全，絕對值得信賴。

當然，咁天然又咁滋補嘅強身方法收費自然唔低，一杯新鮮人奶售價為二千日圓，即係成一百六十蚊港紙，對於普羅大眾嚟講都幾貴。不過，話分兩頭，嚟到呢間專門店，除咗可以飲到新鮮人奶之外，仲可以即場親眼欣賞到整個鮮榨過程，感官刺激極強之外，對好多嚟幫襯嘅男士嚟講，可以算係另一種滋補作用，未飲已經覺得渾身是勁，「性」致勃勃！

品質檢定

由於專門店只係單純提供人奶，如果客人覺得渾身是勁，想作進一步行動，係絕對唔容許嘅！因為各位奶媽都是專門店主要生財「工具」，萬一畀客人亂搞一通，影響生產效能就得不償失喇！不過，客人如果真係想刺激啲，都可以用另一個方法幫襯，就係瞓上奶媽嘅大腿，由奶媽餵奶喇！當然，收費方面又會再提高，每次費用為五千日圓，約為四百蚊港紙。加藤就表示，收取二千日圓一杯，以及五千日圓餵一次奶其實相當抵，因為每個奶媽都經過嚴格嘅品質檢定。每日奶媽開工之前，加藤都會要求對方於自己面前「製作」產品，畀佢用眼睇過，用鼻聞過，用脷試過，檢查過產品冇問題先會畀奶媽招呼客人。另外，仲要問過奶媽有冇健康問題，如果奶媽感冒的話，產品則會帶黃色，而且仲會有酸酸地味添！所以加藤表示其專門店嘅出品保證新鮮又高質，至於堅定流就真係幫襯過嘅客人先知喇！