袁世傑望突破樽頸位
愉園今季成績雖未如理想，惟陣中不少年輕小將「爭住上位」，翼鋒袁世傑便是其中之一。「世傑」今季各項賽事上陣超過20次射入2球，更曾獲選為賽事最佳球員。對於一位年僅21歲的「小朋友」來說，絕對合格有餘，「世傑」直言多得心中「一團火」：「見到好多同齡球員已經打出名堂，或者上咗軌道，加上係第2年踢超聯，知道唔可以再恃住年輕、仲有時間就荒廢落去！」
去季隨愉園首征港超聯，「世傑」便獲得不少上陣機會，雖然交出4次助攻，惟整體表現未足以令人留下深刻印象，他坦言當時並不適應球隊戰術：「由細到大都係踢翼鋒位置，但3-5-2就冇呢個位，好多時都要踢中場或者前鋒，踢法同走位都好唔慣。」
做「7號仔」夠晒享受
今季「世傑」搖身一變，已成為「快活谷」重要一員，季前更由26號轉披上7號球衣，可見被球隊寄予厚望。他笑言當時只想向外界證明自己有能力穿上這個號碼：「C朗係我偶像，所以細細個已經鍾意着7號，但本身係球隊問我先嘅，因為馬希卡歷離咗隊，對我嚟講係個挑戰，但我唔會畀自己太大壓力，反而會好好享受。」
「世傑」擅於與隊友配合，加上爆發力強，其「老鼠仔式」踢法在邊路取得不少優勢，尤其傳中球經常能製造威脅，令他每仗皆有機會上陣。除感謝教練信任外，「世傑」深信自己努力亦同樣重要：「其實我係開心多過驚喜，自己季前好努力加操，透過健身加強對抗性，你肯努力教練一定會睇到，如果你想上陣，前題係要問自己究竟付出咗幾多。」「世傑」年紀雖輕，但目標遠大，短期希望坐穩球隊正選，長遠而言，就是入選香港代表隊及獲得外流機會。
自我警剔踢法勿單一
「對得多咗唔同球隊，對手開始摸索到自己踢法，但呢個係好好嘅提醒，畀自己知道踢法唔可以再咁單一。」「世傑」季尾的上陣時間明顯減少，表現不及季初搶鏡，甚至試過被教練安排出任左翼，他承認遇上「樽頸位」，但自信可作突破更上一層樓。「世傑」特別希望能夠改善進攻表現：「自己踢開5人足球，所以鍾意『埋身波』，但去到11人就要醒目啲踢『離身波』，拎波前要望下附近有冇隊友，視野同『First Touch』要做好啲。」圖／文：李浚湣