黃駿軒誓要爭口氣

「今季第一場比賽對傑志,諗番上次比賽係幾時……差啲唔記得,已經係1月嗰陣對飛馬,先發覺原來踢波係咁奢侈。」受制於疫情、際遇帶來的阻滯,今季加盟標準流浪的黃駿軒,對於仍有幸留在球圈感到欣慰,只希望繼續在綠茵場上揮灑汗水,為喜愛的足球付出所有。

「軒仔」過往3季效力理文,早於「黃衫軍」獨立成軍前已加入球隊,屬「開國功臣」之一。連同2016年以流浪會籍參賽,他一共為理文披甲63場並攻入3球,當中更曾為球隊奪得2018/19年球季的「菁英盃」冠軍。然而,「軒仔」上季僅獲8次出場機會,停擺期間更被放棄,「嗰時差啲就要離開球圈,但我由細到大都想踢波,25歲就要退休?諗都冇諗過。」

投標準流浪扮演連繫角色

面對疫情帶來的震盪,球隊就算不散班亦要縮減班費,球員能否繼續留在港超,取決於是否願意接受大不如前的薪酬待遇。「依家呢個情況,我唔覺得仲需要講咩條件,淨係想留番喺職業足球圈。」在昔日於黃大仙合作過的教練招重文搭路下,「軒仔」得以加盟流浪。他坦承為了繼續踢足球,生活模式也要作出改變,包括間中替朋友教波或打工以幫補生計,只要不影響訓練和比賽,他都願意做。

幾經掙扎,總算留了下來。適逢盧均宜、林嘉緯等老大哥回巢流浪「以老帶新」,而25歲的「軒仔」與姚浩明、李溢晉等今季加盟的中層球員,不論場內或場外,都扮演了連繫小將和老將的角色。不過更令他着緊的,是要向外界證明自己:「嚟踢係為咗爭口氣,證明我哋有能力,唔要我係你嘅損失!」

被球迷忽視落場去到盡

不經不覺,原來黃駿軒在本地頂級聯賽上陣超過100場,對一位港超球員來說絕對不是一個小數目,偏偏在球迷眼中,「軒仔」就如本輪《港超專版》主題所言「睇我唔到」。他坦言曾為此有過負面感受,但既然無法控制際遇、傷患、球隊組軍等客觀環境因素,惟有落場時加把勁:「盡晒力就問心無愧,唔理人哋覺得我好唔好,但我話畀你知,我落到場就一定畀晒你!」

今季聯賽暫停前,標準流浪造訪冠忠南區,在落後1比3劣勢下,完場前連追兩球,最終以3比3逼和對手,堪稱流浪開季至今代表作。交出最後一記助攻的正是黃駿軒!賽後他向記者激昂地道:「就係要話畀後生嗰啲聽,輸1球、2球、3球都好,比賽未完就唔好放棄!」「軒仔」藉着這個峰迴路轉的賽果,令他反思自己在這艱難時刻,仍能立足港超的彌足珍貴:「真係可能踢得一場得一場,要好好珍惜每一分鐘。其實對南區嗰場我仲有少少傷,教練問我得唔得,我話好想踢,因為真係唔知踢埋呢場,下一場係幾時,先諗到原來踢波係咁奢侈。」

名字同音大細軒考起講波佬

今季標準流浪陣中,湊巧地同時出現了兩位黃「進」軒,皆因名字讀音與「軒仔」相同的黃晉軒(Hinson)從佳聯元朗來投,當他們一同上陣之際,場上便會出現兩位同名球員。有球迷笑言若流浪面對理文時,黃駿軒和黃晉軒配合黃皓雋、黃俊皓、袁皓俊3位名稱相似的球員,更容易使人混淆,實在苦了一班「講波佬」。

隊友嗌名唔知點應

不過旁述「中招」之前,當事人黃駿軒竟率先「中伏」,皆因隊友間中在他們並肩同行之際,同時呼叫二人的名字,他們回頭時才知道被隊友「整蠱」。另外「軒仔」又分享一段季前體檢的趣事:「嗰陣姑娘逐個嗌名,當佢嗌到黃『進』軒時,我哋兩個同時企起身,但都唔知邊個入房!我哋仲要連住Number,一個20、一個21,都唔知教練係咪玩我哋!」

文:黃雋謙、圖:鄧曉欣