一波又一波的新冠肺炎疫情，令上季的港超聯無奈要在3月下旬開始停擺，元朗和大埔兩支區隊先退賽後退出，不僅令許多球員失業，亦打亂了不少年輕人的鴻圖大計，當中包括前香港足球隊教練「招積」曾偉忠兒子、上季效力佳聯元朗的曾梓軒。
「上季跟『陳Sir』（前佳聯元朗主教練陳文俊）由凱景加盟元朗，季初都唔錯，Keep住有得踢同有波入。但之後因為讀書要實習，所以要同球會請假，嗰時都預咗實習完要由頭努力過，去爭取出場機會，點知轉頭港超聯因為疫情喺3月停咗，跟手元朗話唔玩復賽同退出，成個大環境變晒。我本來計劃咗，畢業之後會試吓踢全職，之前都係一路踢一路讀書，未試過全心全意踢波，但一直等到6月，乜嘢消息都冇，我先決定打消念頭……」現於東華三院鶴山學校任教的曾梓軒老師回憶道。
作育英才的目標達成，全職足球的夢想未圓，遺憾嗎？「冇喎！起碼我都喺頂級聯賽效力過4隊波，呢啲機會唔係個個都有，好難得嘅。若果要講遺憾嘅感覺，反而係我近兩年都多機會出場，但贏得好少波。」畢竟自小便與足球作伴，「曾老師」今季亦有註冊甲組，與「陳7」陳肇麒、陳偉豪和文彼得等在東區結隊友緣。「只要港超聯可以入番場，我都會入場嘅，因為仲有好多舊隊友努力緊，梗要支持吓佢哋啦！」
因父之名是動力也是壓力，如今離開職業足球，可否認真回答一次，「招積仔」這個稱號，可曾為自己帶來壓力？「梓軒」說：「冇！其實喺足球上面，佢還佢，我還我，只係佢比較出名，啲人知我係佢個仔先咁嗌我，同難免會做比較。但呢啲都係我控制唔到嘅嘢，理嚟做咩呢？我可以控制嘅就只有努力去做好自己。」
已為人師表的「梓軒」，早前跟爸爸媽媽、大哥「梓峻」和大嫂、二哥「梓禮」和準二嫂，一家去到南生圍郊遊兼影「四方帽相」，十分溫馨。「我哋一家人好耐都冇影過家庭照，對上一次應該係10年前，可惜影嗰日我女朋友有事嚟唔到，唔係就更加完美喇。」「曾老師」笑說。