愉園冠忠南區輪換鬥法

愉園上仗以2球不敵東方龍獅，新球季首次落敗，主教練鮑家耀坦言球隊表現未如理想，主要是因為賽程太密，令陣容太大變化，球員一時未能適應。接下來面對冠忠南區，「鮑Sir」豪言目標是全取3分，務求盡快取得出線主導，希望球隊可以盯緊對方主力佐佐木周，以及做好死球戰術。新外援羅拔奧度上仗首次正選披甲，「鮑Sir」認為這名尼日利亞前鋒有更大進步空間：「羅拔奧度上場表現可以接受，佢本身有速度同力量，除咗淨係向前走之外，希望佢可以多啲回後攞波，令對方更難防守。」羅拔奧度今仗有望繼續上陣，不過「鮑Sir」指另一名外援艾迪比帝則未操起，由於愉園8日內征戰3場，預計今仗亦會進行部分輪換。

小將黃浩然今季「菁英盃」失落主力位置，上仗重返正選名單，他坦言相當開心：「上季復賽有好多機會，所以一直保持樂觀，知道唔可以放棄，因為當機會出現，必須好好把握。」另外他亦滿意自己上仗表現，認為即使面對東方龍獅主力前鋒盧卡斯，仍未見太輸蝕，自覺場上愈踢愈放鬆。

林智豐珍惜上陣機會

至於冠忠南區上仗被晉峰逼和1比1，3戰後得4分，暫列小組第3，落後今場對手愉園2分。戰罷不夠1周，冠忠南區就要硬撼「快活谷」，面對密集賽程，主教練列文明言會在陣容上輪換：「我對每位球員都充滿信心，無論係有份或冇份踢嘅球員，都會清楚背後原因，佢哋願意為球隊付出。」上任主教練後，依然不時親身落場應戰的列文，上仗對晉峰一役則全場督戰，他坦言更能看清場上形勢之餘，亦能讓兩位年輕球員有登場機會。其中剛剛升上一隊的前U18小將林智豐，直言上仗「地標戰」獲派上陣感到驚喜：「由註冊到上場比賽，都係啱啱好1個禮拜，首次坐喺後備席就有機會出場，真係冇預計到。」他坦言出戰頂級賽事，無論速度或對抗性都和以前在青年軍比賽有很大分別，需要更加專注，他期望能取得助攻及入球，嘗試在一隊站穩陣腳。