外流葡萄牙迎難而上 梁祐維：永不停步
「踢足球係自己最大嘅興趣，所以就算條路行得有幾困難，我都要一直堅持落去，睇吓自己到底可以走得幾遠。」這句話來自目前效力葡萄牙甲組球會科瓦彼達迪、早前回港曾隨香港23歲以下代表隊集訓的年輕中堅「一仔」梁祐維口中。
2018年離開東方龍獅青年軍後，遠赴葡萄牙加盟當地乙組球會落里什青年隊，再在今年初簽約葡甲球會科瓦彼達迪。「一仔」過去兩年間，一直在葡萄牙埋頭苦練，希望有一日可以亮相葡萄牙職業聯賽。人在異鄉，很多事情都要自己去適應和面對，「一仔」隻身飄洋闖蕩大約兩年，當中一定會經歷過高低起跌，甚至不如意的事。
莫忘初衷變動力
回想起過去在葡萄牙的日子，他認為有時只能咬緊牙關，用自己在球場上的努力，嘗試換取別人的尊重：「有時去到一個新環境，當地嘅隊友見到我嚟自亞洲，可能都會懷疑我嘅實力，咁惟有埋頭努力操練，嘗試用自己嘅表現去證明畀佢哋睇，我係有足夠嘅能力同佢哋一齊踢波，或者挑戰佢哋喺球隊中嘅位置。」
至於在球場外，「一仔」表示掛念香港的家人或者朋友，絕對是在所難免，不過他卻語氣堅定地說：「但係我會同自己講番『莫忘初衷』，好好記住自己當日點解揀行呢條路！」雖然「一仔」外流葡萄牙的經歷，在香港引起了不少球迷的注意，不過他強調自己會腳踏實地，一步一步向上爬：「見到外界有人關注自己，我當然會覺得開心同埋自豪。但係會提醒自己，世界其實係好大，大把年輕球員比我優勝，所以我唔想停留喺目前嘅階段。我要繼續逼自己進步，希望有朝一日，可以喺葡萄牙職業聯賽亮相。」