南韓嘅模特兒不論樣貌同身材，總會令男士有眼前一亮嘅感覺，配合佢哋美艷嘅氣質，更係令人心動不已，難怪有人話想喺芸芸高質車模中突圍而出，僅憑出眾嘅外在條件係唔夠，仲要有過人嘅才華，先至可以令人印象難忘，而南韓超人氣車模朴昭瑜就做到呢點。
出生於南韓首爾嘅朴昭瑜，論外形絕對係冇嘢可以挑剔。標致嘅五官、高挑嘅身材，玲瓏浮凸嘅火辣身段，加上冷艷與熱情兼備嘅氣質，以上任何一點都足以令男士心動，而佢更係將上述各種元素集於一身，試問又點可能唔迷倒眾生呢？如此出眾嘅外在條件，確實冇理由要將佢埋沒，因此早喺2006年，亦即係佢20歲時開始模特兒生涯，並被著名國際性男士雜誌睇中，搵佢拍攝寫真，同年更以南韓代表嘅身份，參加由該雜誌舉辦嘅環球小姐選美比賽。透過呢次比賽，佢獲得高度嘅曝光率，令唔少人欣賞到佢嘅美態，而贏在起跑線上嘅佢，其後獲得更多演出機會。
當時佢主要以時裝模特兒示人，而講到佢同車扯上關係，卻喺翌年先至開始，喺2007年佢以賽車節目女主持嘅身份亮相，美艷嘅樣貌固然令唔少人眼前一亮，而出色嘅口才更係令人留下深刻印象。自此以後，佢以車模身份替汽車雜誌拍照，同時又喺車展上登場，其後佢化身成賽車女郎於賽道上現身，喺2008年成為賽車隊伍嘅專屬車模添！及後佢踩入電玩界，化身成電競比賽女郎，同時成為遊戲代言人，又為遊戲拍攝廣告，絕對係發展相當全面嘅模特兒。
擁有迷人外在美嘅佢口才了得，主持節目完全難佢唔到，家陣做埋網絡直播主持。如果有睇過佢嘅網絡直播，會發現呢位主播唱歌同跳舞亦相當精湛。原來阿妹曾經進軍過樂壇，喺唱功上受過訓練，而佢亦下過唔少苦功，才練成出色嘅唱歌技巧。大家都知道南韓樂壇唔少女歌手，舞功同樣了得，而佢亦練得一身好舞功，難怪佢嘅舞姿迷人，肢體動作屬專業級。
多才多藝固然令佢更易獲得大家嘅注視，人氣亦隨之而不斷飆升，但係仍然對模特兒工作抱有濃厚熱誠嘅佢，並未因此而放棄，仍然為時裝及遊戲拍攝造型照外，又化身車模喺首爾嘅車展上亮相，憑住超高嘅人氣，佢每次亮相總會成為鏡頭嘅焦點。問到喺主播同模特兒之間，佢最享受邊種工作時，佢就話兩者工作性質唔同，前者能展現個人才華，後者則畀到更多人認識佢唔同嘅一面，所以兩種工作都各有吸引嘅地方，令佢難以取捨。
簡介：朴昭瑜唔單止外形迷人，口才亦相當了得，睇過佢做主播嘅話，就會明白點解佢咁吸引。當然，講到佢最令人印象深刻嘅地方，梗係佢一副玲瓏浮凸嘅身材，如果想了解更多女神嘅生活，就要睇佢嘅IG啦！
網址：https://www.instagram.com/soyou_park/
出生地：首爾
身高：170cm
三圍：35、24、34
撰文：魂