鍾貝琪異鄉貴人多

現年22歲的「阿K」鍾貝琪，去年9月遠赴蘇格蘭加盟基爾馬諾克（Kilmarnock），挑戰蘇格蘭女子超級聯賽第二級別（SWPL 2），一圓外流夢。由參與試腳到落實加盟，然後第一次代表球會在正式比賽披甲，前前後後只是約一個月的時間。回望過去，「阿K」直言非常感恩，因其在蘇格蘭的發展，遠比自己想像的順利得多。

「睇番喺蘇格蘭踢波嘅日子，其實一切都算幾順利。由試腳成功到簽約加盟基爾馬諾克，之後又好快獲得上陣機會，再到第一場比賽贏波，當中教練同一班隊友，其實都畀咗我好多信心。雖然因為疫情關係而需要暫時離開蘇格蘭，不過我都好期待當一切回復正常，可以盡快返去基爾馬諾克繼續踢波。」

基爾馬諾克着重控球

「阿K」又提到，蘇格蘭足球一直予人印象，可能比較簡單直接。不過從她在基爾馬諾克所見，很多球隊都着重控球組織，而且對球員的技術、體能及用波速度，一律要求很高，令她在各方面都大開眼界。

「喺香港嘅女子足球聯賽，我已經算係好硬淨嘅一個，但嚟到蘇格蘭，所有隊友踢起上嚟都好硬朗，而且技術水平亦都好平均，所以起初我都好怕自己跟唔上。好彩教練同隊友都好好，見到我有少少擔心，就無論喺球場內外，都主動同我傾多啲偈，等我可以放低心理包袱，盡情交出自己嘅最佳表現。」

好姊妹秦正行開解扶持

加盟基爾馬諾克短短時間，「阿K」已經憑着操練和比賽中不俗的表現，贏得球會肯定，而基爾馬諾克亦在今年初，向「阿K」開出新合約。雖然在蘇格蘭總算站穩陣腳，不過「阿K」表示尚有種種困難要克服，所以她非常感激同樣來自香港的基爾馬諾克隊友秦正行，在異鄉一直扶持她。

「初初去到蘇格蘭，對新嘅生活環境唔係太適應，有時都會感到寂寞，有好幾次仲試過差啲喊咗出嚟。我仲記得初頭，因為自己嘅英文水平麻麻，加上當地人講嘢普遍都有好重口音，所以都擔心過同當地人溝通唔到，唔多敢出街。有時要等到秦正行返嚟屋企陪我傾偈，或者同我一齊出去買吓日用品，咁樣先會有機會出去行吓。諗番起，嗰陣我都畀咗幾大壓力自己，但好好彩身邊有秦正行一直不斷開解我，鼓勵我。」

在異鄉打拚追夢，從來都不是一件容易的事， 不過只要堅持信念，無論任何困難都總會克服得到。「阿K」，加油！