港隊U19 U23開操 梁祐維畢頓各有目標

U23代表隊自去年初U23亞洲足球錦標賽外圍賽後再度召集，其中18歲「外流」小將梁祐維，表示十分珍惜今次機會，坦言很開心能見到不少熟悉的面孔：「氣氛相當融洽，有啲人係識嘅，有啲就唔係太熟，可以趁機做朋友、做隊友。」

現時效力葡甲科瓦彼達迪的梁祐維，希望日後回到葡萄牙，能發揮出今次訓練所吸收的經驗：「希望今次隨U23操練之後，可以令自己眼界同能力提升，進而喺葡萄牙爭取正選位置，將來能夠再次入選U23，甚至大港腳名單。」

已取得特區護照的畢頓，亦是今次U23大軍的新面孔，這位早前於「菁英盃」表現突出的20歲傑志小將，難掩入選的喜悅：「可以參與操練真係好自豪，攞到護照後，好開心可以代表香港。」他坦言自己對隊友並不陌生，今次操練能提升競技狀態，用好表現在教練心中留下好印象，就是他的最大心願。

U19黎培基有得練波勁興奮

至於由足總技術總監艾拿臣和張健峰領軍的U19代表隊，亦於同日開操。其中18歲愉園小將黎培基，就對於闊別綠茵場多時後能踏上草場十分興奮：「今次集訓對自己最大幫助，就係喺球會未有波練嘅時候，呢度有3個星期畀自己保持狀態，由4月停擺到依家，雖然平時都有自己郁吓，但有番個平台練波，真係好開心。」「培基」與這班港隊U19隊友已經並肩作戰多時，他希望今次集訓可以令大家更團結，進一步提升球隊默契。