on.cc東網直播4強大戰硬碰硬 東方龍獅香港飛馬狹路相逢
香港足球總會呈獻「足總盃3月閉門直播」今午於將軍澳運動場上演4強大戰，以「森巴三叉戟」掛帥的東方龍獅惡鬥香港飛馬。挾上圈力挫傑志的氣勢，東方無論戰意、狀態正值高峰，惟飛馬8強戰至加時淘汰佳聯元朗，於「菁英盃」分組賽又贏過東方，氣勢同樣不弱，今日冤家路窄激鬥難免。（on.cc東網周六下午2時30分直播）
8強東方龍獅以2比0力克傑志，惟該仗中場李嘉耀觸傷半月板，或要提早收咧，不過總監兼主教練李志堅認為，最近表現不俗的陳浩瑋可作替補︰「上場波處於膠着狀態時，擺咗陳浩瑋入嚟幫手進攻，令傑志突然間捉摸唔到。其實嗰場每一個人都好攰，當中亦有好多變化，慶幸我哋發揮得好同夠集中，後防又減低到蘇沙嘅作用，呢啲都係關鍵。」
堅Sir囑球員沉着應戰
因借用條款所限，慕沙今仗未能倒戈，不過「堅Sir」估計對手會改變踢法，仍然不容易應付，故需要沉着應戰︰「飛馬上場打到加時贏元朗，證明佢哋鬥志同體能兼備。我估計佢都會傾向防守多啲，所以我哋要有耐性同小心啲。」對於巴西射手盧卡斯上仗與艾里奥爭頂時，導致對方右臉顴骨骨折一事，「堅Sir」則透露會向他作輔導︰「其實呢件事令佢有啲陰影，你見佢攞咗黃牌之後好驚啦！本身佢踢法好勇猛，但係咪過勇就難講，不過我亦深信佢份人係明刀明槍，但都要去調整。」
香港飛馬上圈驚濤駭浪下，於加時以5比4擊敗佳聯元朗晉級，主教練文彼得（Peter）坦言勝仗無疑振奮軍心：「之前『菁英盃』表現唔理想，令到士氣比較差。上場對實力唔弱嘅元朗，最後喺加時贏到波，慕沙仲要入4球，對士氣真係好有幫助。」然而，該名巴西前鋒今仗掛免戰牌，預料會由佐佐木周頂替鋒線工作，Peter指出，球隊今場會多利用敵衞身後的缺口進攻，策略上會偏向防守，趁有機會才快速反擊：「對手實力強，但我哋唔會放棄，佢哋谷得前都要小心後面，因為可能畀到啲空位我哋。」他又稱希望在90分鐘內擊敗對手，盡量不與東方打延長戰。
文彼得度橋壓制「巴西三寶」
基於對手3名前鋒艾華頓、辛祖及盧卡斯，上場面對傑志展現出其強大侵略性，但文彼得形容「巴西三寶」的默契和盤扭能力並非想像中良好，相信透過收窄他們的活動空間能減低威脅，而陣中球員亦有足夠能力應對。
陣容方面，養傷逾1個月的大衞拉菲爾接近康復，今戰或先列後備，中場郭子堦及後衞雷文迪兩人，則分別獲Peter稱讚態度積極和表現優秀，今日有望續任正選。
佐佐木周「長氣」獲激讚
今季獲香港飛馬委任隊長的佐佐木周（Shu），在球隊表現搶鏡，迄今於20場賽事除1場後備上陣外，其餘均正選登場，並貢獻出6個入球，同時獲得球隊與對手主帥點名稱讚。東方龍獅主教練李志堅更對「阿Shu」讚不絕口，相信他是勝負的關鍵︰「佐佐木周活動能力高，係一個好好嘅球員。佢每場波嘅跑動同覆蓋範圍，我諗喺香港就算唔係第一都起碼頭三！佢無論進攻防守都好主動，我認為佢係飛馬最重要嘅球員，既可連繫進攻同防守，態度又好，係飛馬嘅『發電機』嚟！」
至於香港飛馬主帥文彼得亦異口同聲表示，這位日本援將有跑不完的氣力︰「『阿Shu』活動範圍都比較大，基本上每場比賽都跑成12,000米，上場加時跑成16,000幾米，喺120分鐘都跑到咁多，係我哋前線嘅一個主力球員。同埋佢始終練習同比賽態度好好，具有做領袖嘅元素，同時亦都支援到好多球員，值得我哋安排佢做隊長，帶領住球隊！」