on.cc東網港超聯求分大作戰 理文上足彈全力鍊傑志

上仗於「足總盃」力戰至12碼階段遭和富大埔淘汰的理文，主教練陳曉明坦言球隊表現有改善空間︰「如果場波處理得好啲，都唔使等到12碼，有咁多機會攻門都入唔到波，只可以話球隊唔係踢得差，但亦唔夠好！始終隊波喺成個1、2月都係處於個好艱難嘅時期，無論場地上、訓練上，因為賽程不斷轉，我哋嘅操練強度都不斷作出改變，由本身準備『高級組銀牌』決賽，加上有球員受傷、停賽，呢啲嘅問題，令到我哋喺呢個半月至兩個月嘅時間，錯過咗一啲正式比賽嘅機會。我哋上半季其中一樣做得好嘅嘢，就係一路推高緊個狀態，依家個賽期叫做比較穩定番，希望可以喺一個有規律嘅賽期之下，我哋可以慢慢重回正軌。」

陳曉明：「反底」好時機

「陳Sir」亦指，球隊在沒有嚴重傷患困擾下，希望踢出「士氣波」以振軍心︰「傑志人腳好充裕，可以有好多唔同球員上陣，都保持到競爭力，好似上場聯賽對南區冇出費蘭度，所以我哋備戰嚟講都困難啲。我諗每支球隊都有高峰低潮，可能季初對佢哋嚟講係比較低潮，依家到番我哋比較低潮，所以真係要好集中，要搵個機會『反底』，如果今場踢出水準有好成績，信心就會返晒嚟！」

傑志前鋒 費蘭度	理文中場 顏樂楓（黃衫）	傑志前鋒 高美斯

傑志上仗「足總盃」以0比2不敵東方龍獅8強止步，9連勝強勢斷纜，主教練施利斯高域（Blaz）指出，敗仗並沒有影響球隊士氣：「經過檢討後，所有球員都知道球隊有咩不足，雖然失落『足總盃』，但可以畀我哋全神貫注喺聯賽之上，我哋必須提起精神，務求全取3分！」

頻密賽程 施帥會作調整

球隊中堅艾里奧上場與盧卡斯碰撞導致顴骨骨折，估計需休戰逾1個月，就着「9日3賽」的頻密賽程，加上球員耗損的情況，「施帥」稱會調整陣容：「下場將會係機會畀平時較少上陣嘅球員擔當要職，但當然部分主力都會繼續踢，始終佢哋係職業球員，無時無刻都要準備好應付頻密嘅比賽，我會同體能教練商討好，再決定派邊個上陣。」

「藍鳥」衞冕「足總盃」失敗，意味着他們必須贏得聯賽冠軍，才可保着出戰亞洲賽資格。今仗對實力不弱，加上有舊將列斯奧、佐迪倒戈的理文，「Blaz」並不擔心：「我哋餘下仲有『亞協盃』同聯賽有機會爭逐，冇人知兩個月後會發生咩事。我相信自己嘅能力，同球員嘅實力，有信心傑志可以贏得聯賽冠軍！」

文：黃雋謙