侯克結新歡嗒前妻姪女
效力中超上海上港嘅侯克，近日成為球壇話題人物，除咗有傳佢想去西甲搵食外，侯克喺聖誕節前更宣布有新戀情，對象竟然係前妻嘅閨蜜兼姪女！消息曝光後，唔少球迷都「O晒嘴」，事關侯克或者要改口叫前妻做姑媽！
7月離婚 10月展新戀情
侯克今年7月宣布同結婚12年嘅伊蘭離婚，3個仔女就跟侯克喺上海生活。巴西傳媒近日爆料，侯克喺10月份已經另結新歡，對象係31歲嘅卡米娜，而佢竟然係伊蘭最好感情嘅姪女，侯克嘅經理人亦證實：「侯克之前已經打電話同卡米娜嘅家人講呢件事，侯克7月離婚，10月先開始新戀情，佢想主動公開呢個消息，避免啲人亂咁講嘢，佢覺得冇嘢值得隱瞞。」對於呢段出晒位戀情，中國網民就好「擔憂」：「如果侯克結咗婚，前妻就變姑媽」、「第日家庭聚會，啲仔女應該叫媽媽定叫姑婆？」似乎又有啲道理喎。