NBA年度盛事－－全明星賽將於明年2月17日喺芝加哥上演，按照慣例兩隊正選藉着票選誕生。從即日到1月21日，球迷可以透過Google搜尋、NBA官網和應用程式投票，球迷選票佔50%，球員和媒體選票各佔25%。今屆賽事繼續沿用隊長制度，東西岸票王將會擔任隊長，負責挑選隊員。
隨住投票階段展開，各隊亦紛紛為自家球星拉票。火箭剪輯兩位MVP韋斯布克同占士夏登的精華片段；快艇則繪製五星戰隊，包括保羅佐治、李安納及3屆最佳第6人路易斯威廉士嘅卡通海報；活塞就為戴歷羅斯拉票，呢位昔日「風城之子」若然當選，以全明星身份重返芝加哥，場面肯定勁感動。論到最有創意嘅，莫過於76人，佢哋將艾賓特同施蒙斯等合成到電影《真的戀愛了》，模仿當中經典表白方式拉票。