邊位球星今個聖誕最幸福？唔係享受緊天倫樂嘅C朗同美斯，可能係前德國U21國腳戴菲沙爾基！呢位24歲哈化柏林前鋒原來係「大情聖」一名，平安夜向索爆女友Evelyn Konrad求婚，氹到對方又喊又笑終於Say Yes，仲唔係聖誕大贏家？
戴菲沙爾基非常有心思，先安排一個杜拜度假之旅，然後「突襲」Evelyn，搞到呢位2014年德國小姐季軍、2014年互聯網小姐即時「投降」。戴菲沙爾基妙計得逞，自然要立刻晒命，喺Instagram發布一張照片，仲用英語留言「未來嘅沙爾基太太」。連德國《圖片報》都話，自從哈化柏林由奇連士文揸旗後，戴菲沙爾基就順風順水多咗正選機會，家陣仲抱得美人歸，擺明行緊運，2020年各位球迷真係要𥄫實佢。