字母哥牛一攞「雙雙」贈興
字母哥生日搶晒鏡！美國時間上周五係公鹿球星安迪杜甘普嘅25歲生日，正所謂人逢喜事，佢當日上陣寧舍醒神，結果取得27分、11個籃板球嘅「雙雙」，助「東岸一哥」公鹿以119比91力挫西岸勁旅快艇，迎來14連勝。
貴為上季常規賽MVP，「字母哥」今季依然sharp醒，對住擁有李安納同保羅佐治（PG）兩大巨星嘅快艇，無論外投定內線硬爆都一樣得心應手，加上半場休息時獲主場fans高呼「生日快樂」祝賀，結果呢位「壽星仔」全場20投11中，射入27分及搶到11個籃板球，第21次取得「雙雙」。值得一提嘅係，呢場波除咗安迪杜甘普外，公鹿仲有6位球員得分上雙，反觀快艇以PG為首嘅內線完全唔係「字母哥」手腳，進攻方面李安納受嚴密防守下手感平平，全場14射僅5中得17分，最終快艇以91比119大敗。
「孖寶」70分 湖人重創拓荒者
至於西岸「一哥」湖人亦保持強勢，主力安東尼戴維斯全場攻入39分9籃板，勒邦占士貢獻31分7籃板8次助攻，帶領球隊在頭三節已拉開優勢，最終以136比113擊敗拓荒者，並將作客連勝紀錄增至11場。