推崇身教「做啱嘅事畀佢哋睇」

球場內的「少帥」，場外「陳Sir」已是兩子之父（圖）。兩位愛兒「逸朗」、「逸希」的成長，也對陳文俊教練生涯有所啟發︰「做咗爸爸之後，就好想去身教，嗰陣自己仲喺公民踢緊，咁阿仔細個未必明白，但係大個之後再同佢分享番自己嘅經歷，佢就會明白要得到一啲嘢就要付出，而唔係想要一啲嘢就靠運氣。我自問自己踢波一直嘅際遇都唔係好，但係只要你堅持，始終有一日就會遇到一啲幫到你嘅人，你就有機會去爭取一啲你想要嘅嘢。所以舊年有個機會踢番，我都非常樂意去踢，就算年紀大比較辛苦，想畀兩個囝囝睇吓，佢哋亦都好開心。」「陳Sir」續道︰「依家喺我眼中每一個球員或者學生都好，都係好似仔一樣看待，呢個係我性格，我會做我認為係啱嘅事畀佢哋睇。如果我要教佢哋嗰樣嘢，我會做畀佢睇，我唔會淨係叫佢做而自己唔做，因為咁係冇說服力。」