陳文俊態度緊要過捧盃
繼曾昭達及郭嘉諾後，港超地區球隊佳聯元朗今夏繼續起用「少帥」，將帥印交給同樣首度執教職業球隊的陳文俊。上季陳文俊於凱景擔任球員兼助教，如今轉會再「坐正」，就希望以「過來人」的經歷，化身人生導師，在場內場外作出最佳示範，務求令麾下球員進步得更快。
坦言自己球員生涯起伏不定的「陳Sir」，效力公民時贏過「足總盃」冠軍，可惜遇上當時如日中天的南華，與本地頂級聯賽冠軍擦身而過，事隔數載，卻在南華手上搶走高級組銀牌冠軍。然而，他認為獲獎與否並非成功的唯一指標，更重要的是態度︰「當年嘅公民同依家嘅元朗都有啲相似嘅地方，大家都有一啲唔錯嘅球員，但係佢哋未發揮到畀人哋睇到，呢班球員自發性係唔錯，佢哋好需要比賽去表現自己，但係外界並唔知道，結果會畀人話係降班膽，當年公民亦都係畀人咁講過。不過只要球員好集中去做嗰件事，可以由唔叻變成中流砥柱，甚至乎慢慢會變成叻。當年喺公民嘅球員，依家有啲已經獨當一面，有啲北上過發展，有啲係香港嘅一線球員，甚至發展成為教練，我就係其中一個。」
有天分只係「行得快啲」
無論是舊東家公民抑或元朗，在奪標時往往被冠以「神奇」的標籤，不過「陳Sir」則認為奇迹並非從天而降，而是來自球員在場上的付出︰「我會覺得每支球隊都有邁向成功嘅可能，只要球隊抱住正面嘅態度，一齊去投入每件事，肯接受新事物同下苦功就可以。」
在陳文俊眼中，一位球員要踢得出色、踢出成績，擁有優厚天賦只是「行得快啲」，即使天資平庸，肯勤力學習，不斷自我檢討及改善，都可以打出一片天︰「冇人知道你會唔會係首屈一指嘅球員或者教練，你要經歷過做過先知，所以認真、用心同投入係會決定你之後嘅路，如果你唔認真、唔投入嘅，你好快就會玩完！」
圖／文：何彥霆