東網直播足總盃4強激戰 佳聯元朗冠忠南區打甩髀
足總盃4強戰今午假旺角大球場上演「地區打吡」，由佳聯元朗與冠忠南區爭奪決賽席位。由於聯賽冠軍及護級形勢均已塵埃落定，雙方主帥均表示，今場盃賽對決，明顯比兩隊於一周後聯賽煞科的對壘更加重要。究竟哪一支地區球隊能夠殺入決賽，與傑志爭奪冠軍寶座？球迷們記得留意on.cc東網直播！
（on.cc東網周日下午4時直播）
鞏固防守謀定後動
最近兩仗均在大手交易下落敗的佳聯元朗，分別以2比3及3比4的比數，在菁英盃決賽和聯賽分別不敵理文及東方龍獅，主教練郭嘉諾為提高團隊士氣，周中召集一隊成員，見證預備組聯賽奪冠作為「沖喜」，而剛傷愈的葉子俊亦有於該場預備組賽事復出。
對於今仗在盃賽面對擅長防守的冠忠南區，「郭Sir」透露在踢法上會作出改變︰「元朗後上氣勢好好，但老實講我哋對上十幾場波都有失波。始終南區嘅防守好硬淨，而今場係盃賽，所以踢法上會有啲唔同。平時我哋會義無反顧有前冇後進攻，今次唔可以咁癲住，要執番好個防守先，因為對手萬一入咗1至2球的話，我哋就好難攻破佢哋嘅防線。」郭嘉諾重申，希望能夠捧走足總盃以答謝球迷支持︰「我自己作為元朗主教練好唔開心，因為今季喺菁英盃畀唔到球迷1個冠軍，我好想爭取第2個機會捧盃多謝佢哋。」
不敢輕敵和波機高
冠忠南區為應付今場足總盃硬仗，上場聯賽刻意收起部分有傷及累積黃牌球員，但仍以3比1擊敗香港飛馬，球隊提早鎖定前4排名之外，假若在煞科戰能夠全取3分，更有望爭取聯賽亞軍席位。儘管南區曾於聯賽首循環作客以2比1擊敗元朗，但主帥鄭兆聰仍提醒球員不可掉以輕心︰「我哋相當重視呢場足總盃4強，因為大家嘅目標都希望打入決賽。雖然喺聯賽排名上，我們係比佳聯元朗優勝，但喺盃賽場合並冇高低之分，一切都好視乎臨場發揮，所以已經提醒球員要小心，利用場上經驗，令攻守可以有更好發揮。」
「Ricky Sir」亦指，基於雙方實力差距不大，不排除90分鐘內仍未能分出勝負︰「球隊今季喺防守上做得好好，呢個係我哋一向嘅風格，當然喺盃賽嘅情況，我哋都要有兩手準備，可能有機會加時射12碼，呢個可能性都幾高。」