掃走活塞公鹿18年首闖次圈
18年又一條好漢！尋日ＮＢＡ季後賽東岸首圈，公鹿「字母哥」安迪杜甘普大發神威，轟入生涯最高嘅41分，帶領球隊作客以127比104擊敗活塞，總場數4比0橫掃對手，闖入東岸次圈，今次亦係公鹿自2001年賽季後首次打入次圈階段，下輪將鬥同樣以4比0淘汰溜馬嘅塞爾特人。
今季常規賽ＭＶＰ熱門人選之一嘅「字母哥」今場打到「着晒火」，全場為球隊貢獻41分、9個籃板及4個封阻，成為今年季後賽首位攻入「40+」嘅球員，佢喺第3及第4節更領公鹿打出進攻高潮，拉開比賽，在場球迷不斷高呼「ＭＶＰ」，亦有球迷揮動希臘旗，以讚揚呢位希臘球員嘅表現，除「字母哥」外；隊友米度列頓及比迪素夾埋貢獻34分，亦係公鹿晉級嘅無名英雄。反觀活塞頭3節都叫同公鹿咬住上，但去到關鍵第4節全面崩盤，即使列治積遜交出26分及7次助攻，格芬亦射入22分、6次助攻及5個籃板，活塞喺呢個對賽都未能贏番一場，注定捧蛋出局。
爵士出局邊緣擊落火箭
同日西岸大戰，爵士生死戰對火箭打得勁激，「大鬍子」占士夏登今仗已經保持水準，幫火箭攻入30分，但喺出局邊緣嘅爵士背水一戰，憑米切爾打出超水準，攻入31分及7個籃板球，單係第4節短短一節就個人獨取19分，最終爵士喺主場贏107比91，總場數追近至1比3，不過下仗就到番火箭主場。