on.cc東網直播非一般「打吡」 和富大埔冠忠南區爭冠埋牙
今日「中銀人壽香港超級聯賽」頭場和富大埔於主場大埔運動場迎戰冠忠南區，除了是「地區打吡」外，更是影響今季聯賽冠軍誰屬的關鍵一戰！和富大埔只需贏波，便能在榜首擴大領先優勢；相反南區全取3分的話，則追至與大埔同分，並可以較佳對賽成績壓過對手，若然和波「攬炒」，得益者便屬傑志及富力R&F，每個賽果都舉足輕重，至激大戰東網為你送上！（on.cc東網周日下午2時30分直播）
上周中出戰亞協盃的和富大埔，最終以4比2擊敗中華台北代表航源，惟該仗分別有梁冠聰腿部受傷及利馬手臂甩臼而退下火線，主教練李志堅表示除傷兵問題外，球隊仍是較具優勢的一方︰「當然理論上冇人想和波嘅，就算和波，我哋都仲有優勢，始終我哋比佢哋多3分，反而南區必須要贏；第二個優勢就係我哋主場，不過佢哋就以逸待勞，而我哋則征戰連連，又有球員受傷。」
堅Sir：首循環對決改變球隊
大埔與南區今季兩番碰頭，結果各曾小勝1比0，「堅Sir」回憶聯賽首循環強攻下完場前遭夏志明絕殺，改變了球隊一些想法︰「嗰場所有數據上都反映，我哋係主導一方，係一場最難接受嘅敗仗，呢場亦係球隊今季聯賽唯一敗仗，所以喺嗰場波後，我哋都有好多改變，去檢討有時候係咪需要孤注一擲。當然去到呢一刻大家都好肉緊，今場波大家嘅臨場發揮同決心，將會係勝負關鍵。」
作客的冠忠南區上場憑比圖建功逼和傑志，保持爭標希望，今仗遇上另一勁敵和富大埔，主教練鄭兆聰認為：「我哋知道今仗係一場大戰，亦係一場決賽。上場波贏唔到雙方都失望，有少少影響，今日我哋都係想贏，唔會刻意去諗和波，呢方面需要經驗。我哋隊波平均年紀都有30歲，經驗夠晒豐富，呢樣嘢幫到我哋。」
鄭兆聰唔覺體力有優勢
早前對富力R&F時受傷的謝德謙，現已康復並復操，「Ricky Sir」稱：「佢真係好勤力，好想快啲打番，我睇冇乜問題，但係我都要決定用邊個，因為李溢晉呢幾場打得唔錯，呢點我要同教練團再商量。」大埔上周中剛踢畢亞協盃，問及體力會否成優勢時，「Ricky Sir」謂：「我覺得冇咩影響，大埔有足夠人腳，一隊球隊當你休息咗4日，唔係個個星期都一周雙賽，我認為冇乜影響。」