長勝軍愉園挑戰強人港會

愉園季前積極擴軍，羅致了多名富經驗的前港超腳及3名外援，配合多名潛質新秀，未開季已獲公認為奪標大熱。結果，在岑國培、鮑家耀和陸冠邦3位教練帶領下，開季愈戰愈勇，一口氣連贏9場，至於能否取得第10W，就要問過佔主場之利的上季港甲霸主港會喇！對於今場挑戰港甲強人，3名開季以來表現出色的愉園外援前鋒安度美斯、中場馬希卡歷，以及中堅摩域治，皆異口同聲表示期待，並希望能闖過難關，穩坐榜首。

安度美斯：拍住上港超

9戰為愉園射入12球的安度美斯表示：「我哋都知道港會係上季盟主，非常難對付，但愉園要成為冠軍，根本唔需要理會對手係邊個，全力攞走贏波3分就得。我有冇入球都唔緊要，只要擊敗對手就夠！」坦言十分喜愛香港的安度美斯亦伺機表明心跡，希望可以隨愉園升上港超：「雖然言之尚早，但我喺呢度好開心，職、球員之間相處融洽，大家可以一齊征戰港超，相信會係一件好美好嘅事。為咗有呢一日，大家就要努力應付未來每一場賽事。」

馬希卡歷大無畏

由前愉園名將巴古沙引薦來港的馬希卡歷，目前入球雖只及安度美斯一半，但當中不乏難度極高的「世界波」，包括上月21日3比0擊敗南華所入的一球。「我好開心有好表現同幫到愉園贏波，多謝前輩巴古沙幫我搵到愉園咁好嘅球會，佢幾乎每一日都同我聯絡，鼓勵我同講好多佢之前喺香港嘅趣事我知。我好清楚基保、巴古沙、拉斯錫同卡古特之前喺香港都有好出色嘅表現，深受迷球愛戴，所以我會盡全力踢好每一場波，替愉園贏冠軍，唔會失禮幾位波斯尼亞同胞。」馬希卡歷謂。他表示好清楚港會是港甲勁旅，但認為愉園要在聯賽稱王，就要有信心擊敗任何對手。

愉園前鋒 安度美斯

愉園中堅 摩域治

摩域治老婆家鄉睇直播打氣

來港多年，先後效力太陽飛馬、標準灝天和標準流浪的摩域治則謂：「港會上季能夠以25勝5和不敗封王，足證佢哋喺港甲嘅霸主地位，但呢啲已經係上季嘅事，因為港會遇到同樣具有實力嘅挑戰者，就係我哋喇！我好肯定呢場會係一場硬仗，但我同隊友都唔會退縮，希望球迷可以支持我哋，作客港會全取3分。」現時在港「一枝公」的摩域治透露，將會在下月離港返回塞爾維亞老家，探望妻兒，他謂：「好想快啲見到佢哋，太太因為喺家鄉搵到工作，所以冇嚟到香港同我生活，我好掛住佢哋，今場太太同其他親友會一齊睇直播，遠距離為我同愉園打氣！」

今場各位球迷朋友，可以透過愉園facebook專頁「愉園體育會 Happy Valley AA」，以及東網《睇體-本地台》https://tv.on.cc/sportlive/ ，觀看直播。