和富大埔夢想FC打頭陣
本年度菁英盃今午2時30分假大埔運動場開鑼，揭幕戰上演A組賽事，由去屆亞軍和富大埔接受夢想FC挑戰。賽事規定要派不少於兩名22歲以下的本地青年球員落場，和富大埔Ｕ22球員門將錢兆琛、後衞張澤瑋，以及黃祖心、鄭子森兩位翼鋒之中，只有鄭子森曾於今季銀牌賽後備上陣，主教練李志堅坦言球隊在這方面欠缺優勢︰「以往會喺菁英盃前畀到佢哋一啲試驗，但今年較難，始終多咗目標，變咗季初畀佢哋上陣嘅機會少咗，或多或少有影響，所以點調節同安排球員好重要。」
夢想FC方面，在今個月長達3周的空檔期，分別跟甲組球隊標準流浪及傑志進行友賽，並取得1勝1負，主教練梁志榮認為效果不俗︰「呢兩個禮拜冇正式比賽，但兩場友賽打得幾好，佢哋都好認真去練波。」球隊有多達10名Ｕ22球員候命，「細榮」表示︰「球員默契會好啲，因為適齡嘅年輕球員可能都係恆常正選，我哋有林樂勤同林衍廷受傷，不過代替佢哋嘅球員都係適齡球員，亦有能力擔起佢哋嘅工作，希望佢哋發揮到水準，唔好太緊張。」
