酒店商場食肆等住你
今晚超級星期六2場大戰，球迷肯定High翻天，如果你捧阿根廷，不妨留意吓香港阿根廷國家隊球迷會嘅聚會，佢哋同阿根廷駐香港總商會喺黃竹坑一間酒店搞睇波派對，除咗成班鍾意阿根廷嘅球迷，仲可以同住喺香港嘅阿根廷人一齊睇波添，球迷會其實喺最後一場分組賽已經搞過睇波派對，氣氛超正。
直播世盃 apm人流增2成
如果你唔係任何一隊嘅球迷，只想睇好波，大把商場等緊大家，好以觀塘apm咁，64場大戰全部免費播，之前分組賽已經好好氣氛，剛過去矚目賽事包括日本對波蘭、英格蘭對巴拿馬及南韓對德國都勁多人，最多人睇嘅係上周五巴西對哥斯達黎加，商場每日平均人流較上屆升逾2成半達35萬人次。
新鴻基地產（中國）執行董事馮秀炎表示：「總結開鑼至今(6月14至6月28日共15天），新地12大商場總人流達1,700萬，營業額則達港幣3.3億元，較去年升18%及20%。」
16強賽事當然亦會帶旺埋酒吧及食肆等，油麻地一間酒家繼分組賽之後，再度推介火鍋放題及點心自助餐，今輪仲推出優惠，提早訂位每張枱會送紅酒一枝添。