陽光元朗升呢達Sir：靠士氣
港超球隊陽光元朗在主教練曾昭達帶領下，今季表現令人眼前一亮，前半季雖曾經歷6場不勝低潮，然而在高級組銀牌戰線中，接連擊敗和富大埔、傑志及東方龍獅，繼1968年後再次高舉這項錦標；聯賽表現更可謂大躍進，與前列球隊交手不落下風，還往往搶得分數，令球迷喜出望外！
陽光元朗在高級組銀牌賽晉級過程中，最令人始料不及的，想必是在準決賽踢到加時下擊敗傑志，主教練曾昭達認為這一場相當關鍵：「無論對和富大埔又好，對傑志又好，兩隊實力都好強。特別喺4強對傑志，好多人都會睇低我哋。嗰場波我班球員士氣好高，將人哋覺得冇乜可能嘅事，變成有可能。我諗嗰場係今季對我、對球隊嚟講一場最關鍵嘅賽事，甚至比決賽更重要。」
喜見艾華頓獨當一面
這一季，對「達Sir」而言，亦是執教生涯中最豐收的一季：「我嘅得着主要喺執教經驗上，第一，我首次面對咁低嘅低潮；第二，喺低潮中我用咗唔同方法，包括用人、管理、打法、陣式幫球隊解困，得到好寶貴嘅經驗。」除了銀牌對傑志一戰，原來還有一場比賽讓「達Sir」感受至深：「有一場波我好深刻，就係銀牌之後再喺聯賽對東方龍獅，場波我哋好早落後1球，之後一直做主導，冇改變踢法。去到最後階段，我哋淨係用兩個防守球員，其他人都上前攻。我突然體會到，戰術去到嗰一刻唔係最重要，大家點樣為件事去搏命先最重要，最終我哋亦喺尾段追和，搶番1分。」
另外，「達Sir」亦欣喜一班球員有進步，特別是王牌射手艾華頓：「呢個球員無論身體質素定個人能力都好強，佢今年嚟到元朗都有一啲適應上嘅困難，好開心佢好樂意同我一齊解決問題，佢好努力，我都好欣賞佢。依家佢可以稱得上獨當一面，無論要佢打反擊定係陣地戰，佢都處理得幾好。今年我令佢改變咗少少，亦幫到一啲外援提升到另一層次，呢樣係好值得開心嘅。」
本周賽程
中銀人壽香港超級聯賽
5月13日（日）
冠忠南區 Vs 東方龍獅
香港仔運動場
下午2時30分
$80、$30（特惠票）
和富大埔 Vs 香港飛馬
大埔運動場
下午2時30分
$80、$30（特惠票）
標準流浪 Vs 夢想ＦＣ
深水埗運動場
下午2時30分
$80、$30（特惠票）
理文 Vs R＆F富力
將軍澳運動場
下午2時30分
$80、$30（特惠票）
傑志 Vs 陽光元朗
旺角大球場
下午2時30分
$150、$50（特惠票）
圖：何彥霆
文：陳焌鏗