打波年半顯天分 中大生黃嘉詠為冰球搏盡
「2018 Mega Ice五人冰球賽」昨日展開成年組賽事，率先上演的「亞洲B」比賽，由Empire Skate對Wendigos。Empire Skate雖然以1比7落敗，但隊中女將、現役香港女子代表隊成員黃嘉詠（Clarina）表示獲益良多，打冰球只有1年半時間的她，更希望將來能在這項運動發展。
現時為香港中文大學四年級學生的Clarina在場上打得有板有眼，但原來她學習冰球只有1年半，原因只是一個「型」字：「自己本身讀體育，都會玩好多唔同嘅運動。有次去西九龍中心見到有人玩冰球，覺得好型，加上溜冰速度快、打波節奏亦好快，所以就鍾意咗呢項運動。」
修讀體育學以致用
正式加入Empire Skate只有1年，Clarina多謝老闆兼教練詹喬壹的賞識：「我喺Empire Skate做兼職，老闆同時係我嘅教練，佢一直教我好多嘢。」支持她追尋夢想的還有家人：「屋企人好支持我打冰球，因為佢哋知道我鍾意運動，同埋喺運動方面較有天分，但資金方面就要自己搵多啲，始終呢項運動消費都比較貴。」問及未來會否在冰球發展，Clarina謙稱：「自己喺冰球方面都有啲天分，希望喺冰球發展，無論係球員、教練、統籌，我都有興趣。」Clarina更將課堂上的知識學以致用：「讀體育對我打冰球好有幫助，上堂嗰陣讀生物力學、解剖學可以了解到自己身體點樣運作，營養、飲食方面都知道要留意啲咩。」
「2018 Mega Ice五人冰球賽」今進行成年組第二日賽事，Empire Skate將分途出戰「國際B」、「亞洲A」，球隊更會有5名日本球員坐鎮，定有一番龍爭虎鬥。賽事不設門票，歡迎各界人士到場為香港冰球手打氣！
2018 Mega Ice五人冰球賽on.cc東網直播安排
5月5日
晚上7時 成年組「國際Ａ」決賽
晚上8時 成年組「亞洲Elite」決賽
晚上9時 成年組「國際Elite」決賽