唔鬥波鬥嘴港超兵出招拉票

「阿鵬」：識波一定揀華杜斯！

傑志今季聯賽暫時只失11球，屬10隊中失球最少，門將王振鵬功不可沒，他卻將功勞歸功隊友華杜斯：「佢最有機會做足球先生，因為佢太過穩陣，有睇港超都知佢喺場上有幾重要，識足球嘅一定會選佢！」

被眾多球迷看好，華杜斯笑言希望大家都會投票，今季已有11球進帳的他認為，一切均是團隊的成果，並為「阿鵬」拉票：「我加盟已有1年幾，佢一直交出最好表現，今年就係屬於佢嘅1年，無論集中度、穩定性都係咁出眾！」

利馬：胡晉銘係港足未來

香港飛馬演出超越上季，中場重心利馬認為門將位置有提升外，前鋒查維斯的入球與其髮型一樣，為隊友送上無限驚喜，他更大讚副隊長胡晉銘：「佢值得贏取獎項同人哋嘅尊重，佢戴起隊長臂章時總係好可靠，我認為佢係香港足球嘅未來。」

至於胡晉銘就謙稱自己仍力求突破，充滿進步空間：「反而利馬呢3年改進好大，表現愈嚟愈穩定，今季助攻助守，季初佢受傷缺陣，球隊變咗第二隊咁，可見利馬非常重要。」

香港飛馬中場 胡晉銘	和富大埔中場 黃威	東方龍獅後衞 黃梓浩

隊長黃威撐人氣王Igor

和富大埔季前引入前南華門將曾文輝，與李瀚灝互相提高水平，隊長黃威樂見隊友於良性競爭下成長，認為李瀚灝及伊高沙托尼（Igor）一樣有機會問鼎獎項：「Igor人氣最高，今季入咗好多波，雖然今季其他隊伍有好多好前鋒出現，競爭激烈，但都對佢有信心。」

理文門將 陸平中	R&F富力門將 陳梓榮	標準流浪前鋒 劉智樂

李瀚灝認同Igor能為對手帶來威脅及麻煩，但同時強調黃威的功能及角色：「黃威活動範圍大，做到後場到前場嘅串連，呢方面相對出色。」

陽光元朗前鋒 艾華頓	夢想ＦＣ後衞 林衍廷	冠忠南區前鋒 馬高斯

黃梓浩Keep住謙卑

東方龍獅今季成績未如理想，後衞之一的黃梓浩坦言心痛：「季初目標係幫球隊拎錦標，但到依家自己同球隊表現都未達預期，最難忘係輸畀傑志1比8，踢咁耐波未試過慘敗，好心痛。」

去屆足球明星選舉同時當選「最佳青年球員」及「香港足球明星十一人」，不過黃梓浩今屆保持謙卑的心：「今季狀態唔好，希望之後努力再爭取好表現。比我表現好嘅球員更多，自己有機會去參與已經好開心。」

陸平中連環神救搶鏡

理文今季表現不過不失，季中曾錄得6戰4勝2和佳績，除現已攻入14球的射手史提芬彭利拿吸引球迷目光外，後衞謝朗軒指門將陸平中亦有貢獻：「投票揀龍門一定揀佢，今季理文試過連贏幾場，當中佢付出好大努力，有好多精彩撲救令球隊保持不失。」

即使理文於足總盃不敵傑志，但今季極少有球隊可3度攻破傑志大門，陸平中指謝朗軒亦有功勞：「識投一定係投謝朗軒，佢呢場有入波有助攻，今季交出咗好多好靚嘅傳中球，幫到球隊好多，支持理文嘅球迷識揀啦！」

靚仔靚飛撲陳梓榮勝在型

R&F富力季前獲得多位本港入籍兵加盟，本地華人後衞曾健晃今季力爭正選位置，他表示已達到預期目標：「喺咁多外援同入籍兵競爭下，教練都畀到超過10次落場機會我。最難忘係第一次主場贏波，同埋作客夢想FC時，自己喺前場有機會交出助攻。」

他續指伊達及基奧雲尼為球迷所熟悉及有貢獻，有望衝擊獎項，但不忘搞笑地為年輕門將陳梓榮助選：「佢又靚仔又高，飛撲又靚，又喺丹麥踢過波，唔揀佢揀邊個呀？」

劉智樂黎洛賢女粉絲助威

標準流浪雖然已篤定降班，但球隊季初曾擊敗香港飛馬，可說是代表作。球隊亦不時給予年輕球員上陣機會，當中候選最佳青年球員的黎洛賢及前鋒劉智樂就藉出色表現入選港隊。

黎洛賢於省港盃兩回合均正選上陣，最終助港隊重奪省港盃；劉智樂就於賀歲盃中獲補選，首次為港隊披甲即射入處子球。兩位球員老友鬼鬼，齊齊誇獎對方「靚仔、高大又好波，仲要好多女球迷」，未知球迷們對兩人今季表現又如何評價？

「法叔」激讚Keyman艾華頓

陽光元朗今季於高級組銀牌遇強愈強，最終捧走冠軍，巴西外援艾華頓成為首要功臣，他指：「季前我由唔同風格嘅球隊轉投，所有嘢都令我好掙扎，好彩有隊友鼓勵，加上自己每日下苦功，先攞到我職業生涯首個錦標。」

兩度當選每月最有價值球員，艾華頓的成就連同鄉兼隊長「法叔」法比奧亦表揚：「喺我心目中佢係最好，好多場賽事佢都有關鍵性演出，銀牌對和富大埔、傑志同東方龍獅，都係靠佢入波奠勝！」

林衍廷未來港超最佳？

夢想FC上半季踢出超水準，可惜下半季表現回落，不過仍無阻球隊人氣爆燈，最受球迷歡迎的有隊長陳偉豪，以及年僅18歲的後衞林衍廷，副隊長柏保路表示：「我哋每次訓練同比賽都好支持林衍廷，佢年輕又有潛質，只要繼續進步，相信幾年之後會係港超最佳球員！」

今季為夢想FC踢足22場賽事的球員不多，其中一位正是柏保路，林衍廷透露他是隊中的定海神針：「佢喺場上好穩陣，會不時提場，嗌住我哋要幾時埋、幾時搶，畀波佢會好有信心，一定唔會失。」

金球二人組互笠高帽

冠忠南區前鋒線今季屢次射入精彩入球，當中馬高斯於對陽光元朗一役使出半車身抽射，功架十足令人回味無窮，其好拍檔蘇沙對他讚不絕口：「我同佢合作咗兩季，佢喺前線幫助好大，令進攻更順暢，只要交個波畀佢，佢就可以控制到。」

馬高斯亦「禮尚往來」，直指蘇沙技術與眾不同：「某啲動作我根本做唔到，加速、急停再衝刺等等，佢好輕鬆就做到，對我嚟講佢就係零舍唔同！」

快啲Click入網址投票喇！

獎項：香港足球先生、香港足球明星十一人、最佳教練、最佳青年球員、最受球迷歡迎球星及球員之星

投票期：即日起至5月6日

網址：https://www.hkfa.com/vote

本周賽程

中銀人壽香港超級聯賽

4月28日（六）

冠忠南區 Vs 傑志

香港仔運動場

下午2時30分

$80、$30（特惠票）

4月29日（日）

和富大埔 Vs R&F富力

大埔運動場

下午2時30分

$80、$30（特惠票）

夢想FC Vs 理文

青衣運動場

下午5時30分

$60、$20（特惠票）

圖：司徒子文

文：袁志浩