李琪：餘下3仗要贏晒
東南亞職業籃球聯賽（ABL）榜首之爭轉趨緊湊，勢保常規賽「1哥」的香港東方昨晚於修頓主場火併曼谷吸血鬼，即使有林泰樂及時回勇，與「戰神」艾利諾、史迪赫汀加及隊長李琪齊齊錄得「20＋」得分進帳，但受制於敵軍身高2米29的長人迪古拿，被此子取下27分15個籃板及6次封阻強勁數據，最終以111比119不敵客軍。香港東方賽後錄17戰12勝，榜首位置暫被勝率較高的勁敵忠信功夫取代。
開賽初段雙方梅花間竹取分，一度打成10比10，不過吸血鬼身高達2米29的迪古拿手長腳長，多次封阻香港東方的進攻，並於籃底下佔盡優勢，令藍軍中鋒萊恩奧尼爾早已累積兩犯被換出。入替的胡卓斌亦未能箝制這位全球現役籃球員第4高的中鋒，被對方半場轟入21分，加上吸血鬼射手辛格泰維投射命中率高達7成，即使香港東方有林泰樂、艾利諾及史迪赫汀加半場得分上雙，仍以45比60落後。
藍軍4子得分「20＋」
今仗約有30名泰國球迷身穿橙色衫為吸血鬼打氣，而香港東方球迷亦不輸蝕，嗌足全場為「藍軍」加油；落後的香港東方未有放棄，換邊後積極反撲，今仗表現有起色的林泰樂面對家鄉球隊特別醒神，雖然吸血鬼其後使出一輪「三分雨」，連續射入3球三分波，一度拋開24分差距，但香港東方有艾利諾入樽兼博得「And-one」振奮士氣，打出一波16比2攻勢，隊長李琪亦重拾手感，射入兩球救命三分，助藍軍追至只落後7分，掀起全場高潮。不過吸血鬼今仗有射手辛格泰維全場三分球7射5中，獨得全場最高36分，縱使香港東方有4人得分突破「20＋」，力戰下仍以111比119落敗，賽後以17戰12勝位列第2。
去仗曾批評球隊缺乏爭勝心的香港東方隊長李琪，賽後指全隊已展示出拚勁：「成隊波今場已經打出水準之上，已經盡力做好控制範圍內嘅嘢，拚勁同決心都好想贏。不過始終身高差距太遠，外線又畀唔到壓力對方，對手表現比我哋好，有內有外，真係冇辦法。餘下3場一定要贏，避免因排名影響季後賽主場之利。」