香港東方修頓夜捕飛龍

近期「藍軍」於籃總盃的表現令人驚喜，全華班上陣的東方，在缺少專心出戰ABL的外援及隊長李琪之下，大戰甲一勁旅永倫時一度大幅領先，可惜東方未能把握機會，最後被反勝，完場一刻劉子禮激動落淚。「自己尾段抽筋，又踩到隊友腳面，好嬲自己幫唔到球隊。其實係有機會贏，覺得好可惜。」劉子禮直言「輸經驗」，今次在籃總盃擔起領袖角色亦令自己成長不少：「對大家嚟講，都係非常好嘅一課。平時我唔算多嘢講，但依家落到場，變咗最老嗰個，一定要提場。初頭都唔慣，但都要對自己有個交代。」

目標場場8個三分球

「希望藉籃總盃等本地賽，令球迷見到我哋嘅進步。而東方嘅目標，唔係專注呢兩年嘅事，而係希望長遠提升本地籃球員水平，我相信時間會證明一切，我哋都可以挑戰甲一聯賽冠軍。」子禮說。

回到ABL戰線，今晚對手為排行第7的馬來西亞飛龍，這位東方三分射手表示：「返到主場，要做好1對1防守。上場對西貢熱火被對手搶好多籃板球以致輸波，今場對手擅於快攻，同樣唔易應付，所以都係防守行先。」除體能方面要加強，原來「子禮」所選的88號波衫，亦是對自己的另一要求。「好意頭吧，講笑！『8』嘅意思，係希望每場都入8個三分波，係一個好重要嘅籃球啟蒙老師對我嘅要求。」

中鋒胡卓斌（白衫）愈操愈弗，成為香港東方內線最佳幫手。	香港東方隊長 李琪	香港東方戰神 艾利諾

籃球令家庭變融洽

由昔日的「街童」變成職業籃球員，「子禮」回顧近10年的籃球路，又再露出笑容：「依家擁有嘅一切，幾乎都係籃球帶畀我。籃球修補我同屋企人嘅關係，以前又逃學又成日同屋企人嘈交，打籃球之後先定落嚟。依家屋企人都會好關心我嘅籃球事業，就算我冇講都會知我受傷，阿媽會煲蔘湯、阿爸就買水果畀我，關係好番好多。」 經歷傷患後，今季「子禮」重拾狀態，每每在關鍵時刻投進「救命三分」，他感激教練艾度托利斯的支持：「教練喺防守上同賽前心態輔導成功改造我，佢對我期望甚大，今年球隊陣容有變化，我要發揮得更好。」（有線62台周四晚8時直播）