得分超波神 占士連續7年入Final
騎士喺NBA季後賽東岸決賽第5回合作客以135比102擊敗塞爾特人，總場數4比1解決對手，「大帝」勒邦占士唔止打破米高佐敦保持嘅季後賽累積得分紀錄，個人更係連續7年殺入總決賽，簡直喺東岸惡晒！
6.2總決賽展開撼勇士
騎士今仗大勝除艾榮有24分及路夫貢獻15分，勒邦占士更交出35分、8個籃板同8次助攻，個人季後賽累積5,995分，打破「波神」米高佐敦保持嘅5,987分聯盟紀錄，成為史上No.1，連同效力熱火時期，占士亦係連續7年入總決賽。另外騎士第1節攻入43分、半場攻入75分，分別刷新季後賽單節同半場得分新高，相反塞爾特人成為近20年來，首支喺季後賽系列賽中，至少打完3場主場，期間連1秒都未試過領先嘅球隊，就算有主將湯馬士缺陣嘅藉口，依然勁羞家。騎士將會喺香港時間6月2日朝早9點同勇士展開總決賽Game 1大戰。
