踢波唔叻都可以圓夢 曾昭達教出彩虹
年輕，不代表勇武。年僅27歲的曾昭達今季接過九巴元朗帥印，成為港超最年輕教練，陷於落後劣勢仍能冷靜調動，甚至安撫正為球證判決怒火中燒、比自己年長12年的隊長法比奧。「球隊以你為先，唔可以唔成熟。」短短4個月，由「達仔」變「達Sir」的他瞬間長大，教練目標比預期Timeline早到，球員生涯發展一般的「達Sir」努力裝備：「即使踢波唔叻，一樣可以貢獻香港足球」。
「大家叫番我達仔得喇。」角色轉換，面對去季仍在並肩作戰的舊隊友，曾昭達仍保持謙卑。即使那身學院派恤衫Look新打扮，曾被口痕網民揶揄「細路扮大人」，九巴元朗季初的不俗戰績與頭頭是道的漂亮組織，足以為「達Sir」的教練路注下強心針。「本身呢個目標係30歲後，當王威信會長大膽問我有冇勇氣接受挑戰時，我考慮咗2、3日，一來擔心成績壓力，亦怕球員未必相信我。好彩球會上下對我全力支持，畀咗好大自由度我，同球員有傾有講說明要求，始終球隊要互信先可以踢好波。」
做教練「大咗10年」
回想當初獲母校體藝中學邀請執教校隊，只得18歲的「達仔」便報考亞洲足協教練牌照，場外比歐陽耀冲、曾錦濤等同齡隊友走快半步，場上卻漸被拋離。現實與理想總是兩難存，有人選擇離場，他卻主動求變，考入城大及會計系，早為未來謀後路：「呢一刻際遇唔好，唔代表以後都係，最緊要好好裝備，把握機會嘗試改變。嗰時人工唔高，惟有諗方法平衡生活同興趣。後來轉投甲組油尖旺，為補生計試過身兼3份教職，睇住一班青年球員慢慢進步，逐漸開始Enjoy教波樂趣。」
球員年代無憂無慮，擔起教職卻要面對問責。縱然留戀踢波日子，笑言「大咗10年」的「達Sir」，無悔當初：「做教練需要你去長大。從訓練時間安排、剪片部署、點去同球員分析都有學問，多謝兩位助教陳文俊同梁卓長幫手，佢哋經驗比我好，可以用長輩形式同球員溝通。」訪問中，「達Sir」提過很多名字，還特別感激球員場場搏盡，拒做「你總會同意」的Boss。「我希望能當個帶動團隊一起達標的Leader，喺我心目中好教練要將心比己，不論華人外援都願意團結賣命，馮Sir（馮凱文）喺呢方面令我領會最深。同時亦要準備充足，畀到說服力球員，好似陳Sir（陳曉明）除咗有自己一套戰術風格，仲可以清晰表達。」
發掘華將潛力
九巴元朗今季擅用地波及快速反擊戰術，「達Sir」直言是由恩師陳曉明啟發：「我哋嗰代由細被灌輸擅用地波組織，無奈華家堡散班後，大家各散東西。畢竟依家香港球壇比較偏重入籍兵，教練有責任帶番多啲華將出嚟，只要搵啱踢法，本地球員一樣得嘅。」換個方式圓夢，同樣海闊天空。
圖/文：徐嘉嘉