所謂拳頭不打笑面人，咁又有道理！你對住人笑笑口，對方幾嬲都好，亦唔好意思向你郁手郁腳啦！所以大家不妨笑多啲，經常笑口常開，唔單止予人一個好印象，更加可以招來福氣！唔係我講嘅，此話係來自新一代日本青春偶像松永有紗！
有人話女人鍾意同一個識得引佢發笑嘅男人相處，但係最後卻會揀一個會令佢傷心落淚嘅男人；而男人則相反，令佢哋落淚嘅女人唔會要，寧願揀一個令佢哋笑但唔太鍾意嘅女人做老婆。咁又係呀！男人結婚之後為咗養起成頭家而辛辛苦苦工作，返到屋企梗係唔想對住個苦口苦面嘅黃面婆啦！是以，如果小弟未來有幸娶妻，一定會揀松永有紗，點解？因為佢好笑容又夠索囉！
今年18歲嘅有紗係近年躍起嘅日本藝能界青春偶像，面孔甜美可愛，稚氣未消嘅清純氣質，令人回憶起中學時發生嘅初戀呀！而有紗嘅身材雖然平平無奇，但係肌膚鮮嫩白皙，胴體亦唔算太瘦削，不失誘人美態。
有紗喺2012年出道嘅經過同好多青春偶像差不多，都係喺原宿行街街嘅時候，被星探發掘成為少女模特兒，當時阿妹嘅藝名叫佐藤亞里沙。阿妹因為氣質出眾，笑容甜美，獲得時尚雜誌《Ranzuki》招攬為專屬女優。到2015年，阿妹改用現時藝名發展影視及寫真事業。喺電視工作方面，有紗第一個參演嘅節目叫《Wide na Show》，由於阿妹口齒伶俐，可愛得嚟又斯文大方，演出備受賞識，近期參演嘅節目包括《市區DX》及《奇迹體驗》。上年有紗拍咗套電影，就係由漫畫改編而成嘅《暗殺教室》，扮演女角矢田桃花。阿妹瓣瓣都撈得咁掂，真係前途無限。
不過，小弟覺得有紗人氣咁高唔單止係因為美貌同身材，仲因為其笑容。據阿妹表示，佢做人嘅座右銘係「笑面招來福氣」，有紗成日都咁好笑容，唔怪得有運行啦！有紗仲話希望可以憑笑容為大家帶來幸福以及提供心靈治療，近期心灰意冷嘅我真係好需要有紗你呀！
簡介：松永有紗工作密密麻麻，而佢每次工作或去玩之後，都會喺Twitter同大家分享，想緊貼有紗嘅動向就要留意喇。
網址：https://twitter.com/arisa88_fitone?lang=ja
年齡：18歲
身高：5呎3吋
三圍：32-22-33
撰文：賢