羅港威蛻變立志外闖

如果足球也要講求八字相合,羅港威與南華的緣分,大概是天生絕配。首個職業生涯入球便是轟破「少林寺」,「港威」投身球圈短短6載,最耀眼的時刻,也是穿上南華球衣。「球圈好現實,踢唔到就會被淘汰,每一次落場我都要證明自己係得嘅!」別看「港威」外表傻氣戇直,說起前路方向卻勇敢自主,踏出每步更瀟灑。

「有人會質疑年輕球員踢大會好難爭位,但係南華有咁多球迷支持,每一次落場都令我好振奮,好想把握每次機會!」羅港威站在南華會天台居高臨下,百年老店的響亮名字未有帶來千斤重擔。上輪聯賽後備上陣8分鐘便為南華入球追平東方龍獅,港澳埠際賽為港隊梅開二度,曾經被擁南躉寄予厚望的爆速「左羅」,重新歸位。「小學6年班已經開始諗,將來要踢一定要踢本地最Top大球會。多謝足主張廣勇博士,讓我有機會再次喺南華證明自己。」「證明自己」,是「港威」在訪問中說得最多。時光回到小學3年級,帶點「Baby Fat」的怕醜男孩望着壁報版猶豫不決,全因啟蒙老師「廖Sir」一句「試吓啦」,無心插柳加入足球隊,認識了同齡隊友梁冠聰,輾轉再到港青師承李志堅門下。

怕醜仔靠足球開竅

那些年的「堅家軍」橫掃各級青年軍錦標,內向寡言的港威不像黃威天才橫溢,亦沒有「大佬聰」的領袖氣派,首兩季的職業球員路,也是在後備席苦等出頭天。「有時會諗點解我會係後備?我覺得自己仲踢到,所以冇諗過放棄,最後我鼓起勇氣向教練提出畀我走吧,我要嘅唔係因為錢,而係機會。」沉默背後,盡是主見。年紀小小的港威也有自己一套formula:「如果想喺足球身上得到更多,就必須要付出。細個時我唔識用左腳射波,特登睇片學李華度落街係咁射。由細到大,父母都畀我自己去揀,最緊要唔好學壞。」

童年時選擇足球,令不擅辭令的怕醜仔學會與人溝通;長大後兩度出走「上山」,從此成熟蛻變。自決無悔,亦要伯樂提攜:「楊正光教練樂於重用本地球員,以前嘅我只識喺邊路橫衝直撞,當我加盟南華第一季,係『楊Sir』令我開竅學識配合,加埋一班前輩指點,可以進步快啲。」24歲,是時候擺脫「年輕球員」枷鎖,卻也最易迷失。港威曾經想過投考消防員,畢竟「有型穩定又有使命感」,此刻目標卻堅定不移:「如果冇咗足球,我諗我仲係唔多出聲、冇乜朋友。既然選擇咗,就要踢到最高層次,唔單止喺香港,但願有朝一日可以向外闖。」是有種人,自創無數可能,只要你還願意相信夢想2個字。

文/圖:徐嘉嘉