林羽蘇尚瀛為福建拚盡

福建雙子林羽及蘇尚瀛，在球隊VR1與吳業坤結緣，亦師亦友，「坤哥」當然大力支持兩位老友：「阿蘇同阿羽後半段先加入VR1，大家差唔多年紀，所以好好朋友，最重要大家都熱愛籃球，唔會話佢打甲一，我係業餘就有隔膜。」

林羽難忘打到抽筋贏勁敵

雖然「阿羽」和「阿蘇」在甲一球壇並不是巨星，但在福建就扮演重要角色。林羽負責助攻、得分，屬全能球員；而蘇尚瀛則是出色的三分射手。他倆去到VR1扮演的不只是球員，甚至是小教練。在常規賽戰勝勁旅東方，林羽帶病上場，到尾段體力不支甚至抽筋，但仍付出100%，他說：「賽後大家都好激動，唔單止因為贏波，更因為覺得季初到依家嘅努力冇白費！」

「阿蘇」初登新伊好激動

季初重新組軍，經歷一段掙扎時期，到躋身前四，蘇尚瀛亦十分感觸。「季初跌跌撞撞，到後期終於搵到適合陣容，仲打入季後賽，心情其實好激動。我嘅甲一年資仲淺，從來冇試過喺新伊館比賽，對我嚟講將會係一個好好嘅經驗！」福建雖然在四強不敵南華，但仍可與永倫爭季軍，「坤哥」給予「阿羽」和「阿蘇」最大支持：「梗係要支持兩位教練喇，睇得又打得，對住一班球星都絕對唔使驚！」另外，甲一名次賽今晚8時40分假修頓場館舉行，由飛鷹對遊協；頭場女子福建對七喜，門票50元及30元。

一群「籃球發燒友」組成的VR1，已踏入第3個年頭。	「坤哥」（左）與林羽因籃球變成好友。	蘇尚瀛（左）向小球員灌輸運動訊息。

向基層小球手發放正能量

球員Crossover演藝界合組球隊，成為一股新力量。由歌手吳業坤、胡鴻鈞和甲一球員林羽、蘇尚瀛等組成的熱血球隊VR1，今年迎來球隊3周年紀念，一眾隊員都盡量抽空，以球隊名義參與慈善活動。胡鴻鈞笑說：「歌唱比賽的時候，與坤哥都有一個理想，很想實現以前想打甲一的夢想，但當然有一定難度，所以決定自己組成一支球隊。」

慶祝3周年的同時，他們參與了希望種子籃球成長企劃，與基層家庭的小球員切磋球技，一眾球員都希望可借籃球宣揚運動訊息，始終新一代經常對着電腦及電話，應該多抽時間去運動！

圖／文：黃兆崑、王藝霖