犀利爸媽撑到行梁門巴打拍住上

家中大門當龍門,弄得神檯上的觀音碎片橫飛……香港飛馬兄弟兵梁冠聰與梁諾恆的足球初體驗,堪稱「屋邨仔」的集體回憶。從大肥仔變身大港腳,梁氏兄弟形影不離拍住上,全賴最強後盾全力支援─風雨不改從旁打氣的「犀利爸媽」。「我好欣賞兩個仔堅持理想。」在世間遮風擋雨有一種愛,正好在梁爸爸看着兒子的殷切眼神中找到。

為趕去比賽亡命飛車

「呢度以前冇咁多食肆,海邊條長廊都係早幾年先起……」梁爸爸帶着記者介紹,沿途不乏街坊問候一對兒子─梁冠聰與梁諾恆球場內外近況。作為屯門最早發展及安頓漁民的屋邨,三聖邨的海鮮街近年變成遊客聖地,當日對着牆壁球來球往的小兄弟,亦雙雙擢升大港腳行列。「記得有次傍晚6點便要到九龍仔公園比賽,阿哥5點半放學,我逢車過車由屯門用咗20分鐘趕到出去,諗番起都有啲驚。」

這些年來,梁爸爸唯一一次沒有到球場打氣,正是身體不適入院檢查。虎爸虎媽望子成龍,往往苦了孩子,唯有真心關愛,才可健康成長。冠聰心領神會:「有時太肉麻說話未必講得出口,但爹哋媽咪會用足球做話題引導我哋講出心事,成為溝通橋樑。」「細佬」諾恆亦然:「即使踢波未必有前途仍咁支持,長大後一定要好好回報。」

發展受挫幸彼此扶持

成長,未有讓親子關係變得疏離,卻難免遇上煩惱。24歲的冠聰尋求樽頸位突破,年輕2歲的「細佬」也一度面對傷病困擾,猶幸彼此扶持。「就像小孩子出到社會工作,需面對不同層面階級,我與陣中隊友也是第一次面對,能夠做的,便只有做好自己。」冠聰透徹分析,細佬立即安慰:「有挫敗先至會成長。」

在早前對標準流浪的聯賽盃,哥哥被對手踢傷,細佬真情流露向球證理論。梁爸爸隨即踢爆,細佬在友儕間卻是「小大佬」。「可能是我有意無意在學習阿哥,他自幼也是隊長經常提場,我見他嗌又跟着嗌,現在每次出外比賽,我們仍會同房,因為有他幫我拎行李嘛。」梁媽媽形容細佬像她有着小聰明,果真沒錯。難得「阿哥」抵得諗:「我似爸爸正直唔偷食嘛!呢個世界總有人用旁門左道,我卻始終相信應該要循正途真真正正去贏人。」即使家住屯門,兩兄弟操練仍然比隊友早到一小時。循規蹈矩,未必走得比人快,卻往往走得更遠。

圖:司徒子文

文:KaKa