張健峰最愛家庭樂
提到今季加盟南華的張健峰，相信球迷們會立即聯想到「GPS峰」這個新花朵，又或者記得他是球圈其中一位「手段哥」，每逢大時大節都會「出招」氹童顏嬌妻Pecky開心。但其實「張峰」亦是球圈中出名的好爸爸，教仔、湊仔跟左路出波同樣耍家！
可能受年幼時爸爸長期在海外工作所影響，令「張峰」十分珍惜與兒子相聚的時間，也深明親子活動的重要性。「球圈好爸爸？我唔敢當！大把爸爸比我做得更好，只係我好清楚小朋友有時候會好掛住爸爸，所以我依家會盡量唔好令到個仔唔開心。」「張峰」表示平日愛兒「晉珞」返學都會爭取時間「包接送」，因為兩仔爺邊行邊傾，互相關心好滿足。
之前「晉珞」學校邀請「張峰」參與一個職業介紹活動，分享當職業足球員的感受，「張峰」為親身體驗兒子的校內生活，不消考慮便答應出席：「當住幾十人面前講嘢的確難為情，不過見到阿仔望住我嘅眼神同燦爛笑容，乜到抵番晒啦！」
據「張峰」太太Pecky所講，洋名Aiden的「晉珞」盡得父母真傳，充滿運動細胞，不過「張峰」為讓Aiden體驗各項運動之樂趣，從不會局限其發展：「冇必要咁早限定佢玩邊項運動，個仔大咗自己會揀！可能佢瓣瓣精呢，哈哈！」
活動教學 認識世界
「張峰」還有一招值得各位爸爸「偷師」，就是運用囝囝對爸爸的關心進行活動教學：「屋企有幅好大嘅世界地圖，Aiden好鍾意記低我去過邊度比賽或者集訓，我返到屋企佢就會好仔細咁問我要飛幾多個鐘，或者嗰度熱定凍、啲人講乜語言等等。過程中，唔只令Aiden更加了解我嘅工作，亦增加咗佢對世界地理嘅認識同興趣。」上個月「張峰」就與Pecky和Aiden到泰國芭堤雅旅行，除吃喝玩樂外，亦安排Aiden參加各式各樣活動，包括與海豚作近距離接觸，讓兒子度過一個有所得着的假期。
文：戴陶蔚 （相片由受訪者提供）