作為一個普通打工仔唔好話賺錢買花戴，想輕輕鬆鬆咁搵食，已經係天方夜譚嘅事。不過對內地新進嫩模王朝朝嚟講，外形迷人兼擁有長腿嘅佢，雖然未去到買花戴嘅地步，但輕鬆兩字卻已經做到有凸，否則熱愛旅遊嘅佢，又點可能每個月都去唔同嘅地方玩呢？
今年20歲，原名王若明，英文名叫Romi嘅北京姑娘王朝朝，擁有火辣身材，樣貌更係甜美可人，最重要係佢唔單止有外在，誘人嘅氣質加上內涵，更係令人對佢深深着迷。點解話佢有內涵呢？原來作為新進模特兒嘅佢，家陣亦係北京科技大學嘅學生，論學歷之高確係喺模特兒界少見。此外，阿妹擅長寫作，文字功力亦相當唔錯，難怪有人稱佢做內外兼備嘅索女。話說回來，其實稱佢做新進模特兒有啲唔啱，事關佢早喺去年已經從事相關工作，只係當時嘅佢仍未全力發功，只係間中客串一下。及至今年初，佢先至全身投入工作，而憑住佢出眾嘅外形及前凸後趷嘅身材，不但獲得唔少工作機會，甚至可以到海外拍攝寫真，而從呢點可以睇出，佢未來嘅發展值得期待。
雖然佢擁有出眾嘅外在條件，以及唔少嘅拍攝寫真機會，只係佢好似並唔係咁急於喺模特兒界做出亮眼嘅成績，點解會咁講呢？原因並非佢要顧及學業，而係因為熱愛旅遊，每個月都抽出唔少時間到處玩樂，足迹遍及雲南、杭州、重慶，以至泰國等地，試問佢花咁多時間旅遊，又點可以密密推出寫真呢？佢之所以有咁嘅決定，應該同佢想趁住年輕，想好好睇吓呢個世界有關，正如佢喺個人微博上嘅留言，希望能夠讓青春留下多啲嘅回憶一樣。除咗旅遊外，佢亦好享受同朋友共享美妙嘅夜生活，從佢上載嘅生活照中可以得知，經常同朋友到唔同嘅酒吧同餐廳，品嘗美妙嘅味覺之旅。當然，年輕好玩樂嘅心態係人都有，只係希望佢能推出更多亮眼嘅寫真，等粉絲有更多欣賞得到佢美態嘅機會。
如果問王朝朝嘅氣質係屬於邊一類，唔少佢嘅粉絲都會答係純情。事實上，擁有如此火辣身材嘅佢，不但一啲都冇招搖嘅感覺，純情嘅味道加上恍如鄰家女孩般嘅形象，更係打動唔少男士嘅心。如果想了解多啲，記得要成為佢個人微博嘅追隨者喇！
網址：www.weibo.com/u/3484824602
出生地：北京
身高：170cm
三圍：35、25、37
撰文：魂