沙柏:曼聯今季重拾輝煌

前曼聯球星沙柏昨日訪港擔任adidas Cup 2015 U10、U12及U14的頒獎嘉賓,其後接受訪問大「賣口乖」,指曼聯重返adidas懷抱係好事。講到母會今季英超的機會,沙柏指最大對手係車路士、阿仙奴同曼城,但如果這3支球隊於歐聯「愈行愈遠」,對曼聯爭英超冠軍絕對係好事。

沙柏昨晚抵達adidas Sports Base觀賞賽事及擔任頒獎嘉賓,對於一眾小朋友的球技讚不絕口,更對U10決賽出現兩記中門楣彈出的射門嘆為觀止。至於對adidas Sport Base的環境,沙柏指簡直係完美,相信這場地可令更多人享受運動樂趣。

7年前曾來香港的沙柏,今次盡顯親民形象,球迷要求合照或簽名永冇「托手(月爭)」。他接受訪問時指曼聯今次回歸adidas懷抱係最好不過的事,因為紅魔最輝煌的時刻,正正係由adidas作為球衣生產商的時代。

盼英超勁敵歐聯走遠

對於曼聯今季爭標路途,沙柏則顯得有點保守,指紅魔於英超最大的對手係車路士、阿仙奴同曼城,而歐聯的對手好似巴塞隆拿、皇家馬德里同拜仁慕尼黑實力都非常強,但若果車路士同曼城於歐聯走得愈遠,曼聯重奪英超機會就愈大。沙柏今天將繼續擔任adidas Cup賽事的頒獎嘉賓,想野生捕獲沙柏的朋友記得到adidas Sports Base守候。

太陽飛馬小將贏兩冠

至於adidas Cup的賽事,太陽飛馬U14及U12在決賽分別以1比0擊敗Monsters,及以2比1反勝LICHEE KIDS,成為賽事的大贏家。至於車路士足球學校則於U10組別,憑完場的絕殺,以3比2擊敗阿仙奴U10捧盃。