酒店直擊馬斯真蘭奴Gym得徹底
阿根廷大軍前晚壓境，昨日早上當大部分球星都選擇留喺酒店房間休息之際，唯獨馬斯真蘭奴就一支公去咗健身室，仲狂操近粒半鐘，全程被本報直擊！「舉鐵」、跑步機及一系列拉筋動作對這位巴塞鐵衞嚟講可謂毫無難度，操到咁行都唔見佢索氣，勁！
馬斯真蘭奴絕密健身照片，可謂彌足珍貴！事關當一眾球星好「靜焗」匿埋酒店房休息，包括只有阿古路喺Facebook舖咗一張由睡房拍攝海景嘅相片「透露行踪」外，昨日整個上午一眾「追星族」捕唔到偶像蒲頭。大約到10點，身穿阿根廷隊衫及波褲嘅馬斯真蘭奴低調獨闖酒店20樓嘅Gym Room，連附近做運動的人都認唔出佢。
跑步舉鐵拉筋做足晒
佢首先喺跑步機上以高速奔跑練氣，每步踏出都「砰砰聲」，絕冇揸流攤。跑咗半粒鐘後轉戰舉重區，乾淨俐落地舉起每一下，展現Man爆一面。之後佢仲未夠喉，走到一個跳舞室內不停做伸展拉筋動作，最後要阿隊工作人員嚟「提醒」佢，先至結束鍛練。
見證馬斯真蘭奴全神貫注嘅訓練態度後，可理解這位防守中場為何總能在場上表現硬淨，大家油然記得世界盃4強時佢被荷蘭敵人踢中「要害」仍堅持踢到最後，呢嘅功夫絕對是勤力累積返嚟。