歷屆王者濠江晒冷
第60屆澳門格蘭披治大賽車第二周賽事今日殺到，上個禮拜支援賽已經睇到大家拍爛手掌，今周賽事更加精采，多名冠軍級車手將會亮相，包括衞冕三級方程嘅達哥斯達、八屆澳門格蘭披治電單車大賽盟主路達、以及出戰GT盃嘅「澳門先生」莫他拿。除此之外，為慶祝鑽禧，今年增設一場中國大師挑戰賽，搵嚟歷年曾經喺東望洋跑道揚威過嘅車手嚟一場「冠中冠」賽事，星光熠熠，吸引力絕對爆晒燈。
達哥斯達F3衞冕戰
先講吓三大賽事啲星級車手，澳門格蘭披治電單車大賽八屆冠軍路達會再嚟角逐，舊年佢喺毫無威脅下輕鬆奪冠，但今屆有另一名將英國嘅赫徹臣崔護重來，路達能否連續兩年封王，就要同赫徹臣拗手瓜。至於三級方程式賽事，葡萄牙嘅達哥斯達將會進行衞冕，不過，佢要同各地不同比賽嘅高手比併，包括英國三級方程式巡迴賽冠軍英國嘅京治、歐洲三級方程式錦標賽冠軍意大利車手馬些路、日本三級方程式錦標賽冠軍中山雄一等。
李英健挑戰GT盃
至於上周已經贏咗奧迪R8 LMS盃嘅莫他拿，將會同本港車手李英健繼續駕駛Audi R8爭取新濠天地澳門GT盃，同場仲有非常熟悉東望洋賽道嘅日本車手澤圭太，以及德國名將梅拿，肯定鬥得難分難解。
除此之外，車迷特別要留意中國大師挑戰賽，為慶祝賽事60周年，賽會專程搵嚟昔日喺澳門揚威過嘅車手，用同規格嘅戰車嚟一場「冠中冠」賽事。參賽車手來頭不小，1987年F3冠車當尼利（Martin Donnelly）及1989年F3冠軍大衞百拉咸（David Brabham）都曾經亮相一級方程式，仲有2006年冠軍康威（Mike Conway）、2008年盟主國本京佑都會參兄。老一輩車迷熟悉嘅名字亦會喺呢項挑戰賽出現，包括第一代賭王傅老榕嘅孫傅厚澤、仇偉冠、艾莫廉等，陣容可謂非常強大。
今日秩序
7:30am 星河灣‧名門世家澳門格蘭披治電單車大賽—練習
8:55am 金光大道度假區蓮花大中華盃—練習
9:55am 太陽城集團澳門路車挑戰賽－練習
10:55am 星河灣‧名門世家澳門格蘭披治三級方程式大賽—練習
12:00nn 新濠天地澳門GT盃—練習
12:50pm 尚酷R中國大師挑戰賽－練習
1:50pm FIA世界房車錦標賽–澳門東望洋大賽—星河灣‧名門世家特約—試跑
3:50pm 星河灣‧名門世家澳門格蘭披治電單車大賽—排位賽