「畀獎金，嘩！送百萬當係碎銀，畀獎品，嘩！厚禮是登登登登……」正所謂重賞之下，必有勇夫，每逢國際大賽，國家政府、體育組織、商業機構往往動輒提供百萬計獎金，激勵運動員爭取佳績。不過，並非人人以金錢掛帥，或者礙於財力不足，惟有絞盡腦汁，諗出各種奇特、罕有嘅「另類」獎賞勞軍，誠意搭夠更珍貴。
尼日利亞今年成為喺南非舉行嘅非國盃冠軍，原來早喺四強戰已有份大禮刺激士氣，尼日利亞妓女協會喺準決賽前發表聲明，承諾球隊奪冠後可以免費召妓一星期。據悉尼日利亞今屆賽事一直有妓女隨隊「勞軍」，妓女協會秘書長艾維絲喺決賽前受訪，話會安排更多會員飛去南非打氣。尼日利亞最終成功捧盃，成班球員有得狂食「免費餐」，捧盃時笑到見牙唔見眼。
電話號碼都可以當作獎品？蒙古男子柔道名將圖布辛巴亞爾喺2008年北京奧運，奪得100公斤級柔道冠軍，成為蒙古史上首位奧運金牌得主之後，收到該國電訊公司送出9999-9999電話號碼。原來9字對蒙古人來講，具有幸運、吉祥嘅意思，呢個電話號碼係祝福圖布辛巴亞爾能夠得到幸運之神幫助。而且9999-9999電話號碼係獨一無二，可凸顯圖布辛巴亞爾尊貴身份。
非洲國家經濟發展普遍比較落後，政府、足總或者團體多數畀唔起巨額金錢，往往用實物代替。贊比亞爆冷奪得2012年非國盃冠軍，功臣門將麥韋尼獲得一名酋長送出250公頃土地及兩隻乳牛作為獎勵。大家千祈唔好睇小呢兩份獎品，當地人視土地及乳牛為命根，兩者係農業必需品，為佢哋提供生活所需，一向珍而重之，意義重大，絕非金錢可以衡量。
超級富豪球隊去外國比賽時，球員會坐球會私人飛機，但有啲貧窮國家嘅球隊，連私人大巴都冇，作客比賽要自己搭車去o架！非洲國家肯尼亞出晒名窮，塔斯克係國內勁旅，多次取得頂級聯賽冠軍，喺當地無人不識，但竟然衰到冇自己所屬大巴。2011年，當佢哋再次稱霸後，有贊助公司非常貼心送出一部大巴，以後佢哋作客就可以舒服啲喇。
南韓希望喺2012年倫敦奧運爭取佳績，開出特別獎賞，所有喺倫奧獲獎嘅運動員統統都可免除兵役，條件相當吸引。其中男子足球代表喺季軍戰惡鬥死敵日本，陣上展現強橫鬥心，最終成功擊敗強敵奪得銅牌，全軍上下都唔使服役，認真「疏乎」。不過，南韓士哥功臣朴鍾佑賽後高舉「獨島係我國領土」標語，搞到差啲被褫奪獎牌，隔咗半年先拎番，都算執番身彩。
民以食為天，如果知道代表團鍾意食咩，之後以此作獎勵，都幾好吖！08年北京奧運前，白俄羅斯一間食品公司就承諾邊個代表成員或團體能夠奪得金牌，就終身請食香腸！白俄人出名鍾意食腸，呢份獎品的確非常吸引。白俄女子籃球隊喺國內極受歡迎，所以贊助公司話，就算佢哋只攞到獎牌，都可以成世免費吔腸，可惜佢哋最終只排第六。
2006年德國世界盃，中北美洲球隊千里達為激勵國腳擊敗英格蘭，著名酒廠Augostura揚言提供24桶朗姆酒，每桶容量大約247公升。千里達人鍾意飲酒，一桶上等佳釀擺喺面前就會歡呼雀躍。其實所謂朗姆酒亦即係香港人所講嘅冧酒，主要以蔗糖釀製。據悉千里達氣溫高，農民落田工作相當辛苦，鍾意大啖灌下冧酒消暑，久而久之就成為千里達人飲酒文化。
希臘對於奧運金牌運動員極之尊敬，政府不但送錢，仲會向冠軍級運動員安排公職，以2008年北京奧運為例，奪得金牌可獲保送當兵成為軍官，可以一世獲國家糧餉。北韓亦都出現類似情況，如有運動員奪金，政府會送大米、黃豆、汽車及住屋，但有獎就有罰，盛傳佢哋嘅國家足球隊喺2012年世界盃成績欠佳，球員回國要放逐做礦工！
文：洪志培