孫楊畀教練打報警調停
孫楊被教練打要警察介入調停！雖然孫楊獲教練朱志根一手帶大贏得奧運金牌，但師徒之間一個反叛、一個火爆，前排已經因為孫楊搞姐弟戀而「反晒面」，估唔到冰釋前嫌唔夠兩個月，二人又喺泳池發生衝突，朱志根仲將孫楊嘅手臂打到腫晒，牽涉入案嘅一名贊助商工作人員其後報警，莫非今次真係要搞到師徒決裂？
事情喺4月15日下午發生，話說當時孫楊正練水，突然間「老朱」唔知點解氣沖沖咁衝入泳館，大聲喝令一名浙江泳隊嘅贊助商工作人員「滾蛋」，此人曾陪同孫楊到倫敦奧運，分屬好友，佢不甘被辱，反駁「憑乜嘢叫我走？」於是「老朱」無名火起揮起手中嘅訓練秒錶打佢，孫楊想「幫拖」卻被打埋一份，仲差啲被「兜巴星」。該贊助商人員其後打電話報警，佢嘅眼睛被打到充血，而孫楊嘅手臂就瘀咗一撻。
昆明高原集訓受阻
浙江體育職業技術學院副院長張亞東就企圖淡化事件，回應話事件喺發生當天已解決，「沒那麼嚴重」，但今次衝突將打亂孫楊到昆明高原集訓的計劃，對佢七月世界賽爭金構成好大打擊，唉，跌爛咗嘅鏡好難重圓，今次唔知點收科囉！