舒拉寶娃生日快樂！4月19日出世嘅俄羅斯網球「二姐」舒拉寶娃，前日派糖迎接26歲生日，佢去到洛杉磯一間有得賣Sugarpova糖果嘅舖頭宣傳，當地居民知道寶娃來臨，晨咁早就排晒隊等攞簽名，最正係有BB可以一親寶娃香澤。寶娃將啲相上載自己facebook，其中一張飛吻相，搞到唔少宅男暈晒大浪，留言回應「宅」到有啲變態。
Sugarpova舊年八月上架，已經急速打入少女市場，雖然前日26歲生日，但一向事業心甚重嘅寶娃，同教練一行人練波，獲教練組成員送上自製餅乾，砌成「Happy Birthday Champ」（生日快樂，冠軍）畀寶娃，搞到伊人鬼咁開心。
除咗網球，佢依家嘅第二事業就係自己親自設計嘅Sugarpova軟糖，「舒老闆」微服出巡，牛一都照做宣傳，着住靚靚花裙落到South Bay來者不拒，不過說來奇怪，排隊攞簽名嘅女多過男，唔知係咪啲男仔都匿埋晒喺屋企玩電腦呢？
當舒拉寶娃放啲相上facebook，立即有大堆男士回應，留言就有啲肉麻風趣，有一張寶娃飛吻照片，有留言寫「我已經捉住咗你個Kiss啦」、亦有「我哋有一個共同之處，就係我唔識你，你亦唔識我，所以我愛你！」，有留言仲變態到「Sugarpova好甜，你都係，尤其你個嘴唇，噢……」，總之齊齊大叫「摩牙」啦！