A米請小朋友睇波有好報
一場無情的車禍，奪去了紐約人球星史杜迪米亞（A米）胞兄寶貴的生命，但其正能量卻得以延續下去！適逢上周六乃「A米」哥哥Hazell生忌，「A米」在昨天紐約人作客對魔術的比賽出錢又出力，親自接送三十位小朋友入場睇波，賽後又搞聚餐同小朋友分享做人的道理。
延續哥哥遺願散發正能量
Hazell去年二月因車禍去世，「A米」隨即在右眼角下方紋上流淚圖案作悼念，上周六又透過twitter上載與Hazell生前的合照，兩兄弟堪稱手足情深。「A米」為延續胞兄回饋社區的遺願，昨日更出動校巴接載三十位來自佛羅里達州的小朋友入場睇波，更請食飯兼向每人派發其撰寫的自傳《STAT：DOUBLE TEAM》，眾人滿載而歸。
史杜迪米亞向《ESPN》表示：「Hazell生前對家庭同朋友都一流，我好想幫佢延續呢股正能量，亦令我可以有機會向一班小朋友分享人生嘅道理，話畀佢哋知讀書係有幾重要，同埋點樣去追逐夢想。」「A米」今次真係好心有好報，昨日與隊友安東尼合力轟入51分，帶領紐約人以114比106擊敗魔術，明早鬥今非昔比的塞爾特人料可繼續秤先，主場讓4.5分一於捧上盤。
另外，木狼當家球星路夫日前對金塊時右手受傷，證實右手第三掌骨骨折，路夫已前往紐約接受專家檢驗，具體需要休息多久屬未知數。木狼在路夫與及另一主力列比奧缺陣下，昨日主場以97比102不敵拓荒者。